Hədəf Azərbaycan-Türkiyə-Pakistan ticarət dövriyyəsini 15 milyarda çatdırmaqdır – DEPUTAT
Müstəqilliyin ilk günlərindən Azərbaycanın yanında olan Türkiyə və Pakistan bu gün də regional və beynəlxalq arenada ölkəmizin ən yaxın müttəfiqləri kimi çıxış edirlər. Bu qardaş dövlətlərin liderləri – Prezident Rəcəb Tayyib Ərdoğan və Baş nazir Şahbaz Şərif – Azərbaycanın hərbi-siyasi mövqeyini güclü şəkildə dəstəkləməklə yanaşı, dostluq və qarşılıqlı etimad üzərində qurulmuş münasibətləri daha da dərinləşdirmək istiqamətində mühüm addımlar atırlar. Son illər regional əməkdaşlığın və qardaşlıq münasibətlərinin daha da möhkəmləndirilməsi üçün atılan addımlar öz bəhrəsini verir. Xüsusilə dünən Laçında baş tutan Azərbaycan–Türkiyə–Pakistan liderlərinin görüşü regionun geosiyasi mənzərəsində yeni bir mərhələnin başlanğıcını qoydu. Bir zamanlar işğal altında olan, lakin bu gün Azərbaycan xalqının əzmkar mübarizəsi ilə azad edilmiş və yenidən dirçələn Laçın, bu tarixi görüşə ev sahibliyi etməklə yalnız diplomatik tədbir məkanı deyil, həm də türk həmrəyliyinin və strateji ittifaqın canlı simvoluna çevrilir.
Türkiyə-Azərbaycan-Pakistan münasibətlərinin iqtisadi-siyasi aspektləri bağlı Milli Məclisin deputatı Vüqar Bayramov Crossmedia.az-a açıqlama verib:
“Azərbaycan-Türkiyə-Pakistan əməkdaşlığı bir daha beynəlxalq münasibətlərdə strateji yaxınlıq və dostluğa əsaslanan xarici siyasət modelini nümayiş etdirdi. Son illər biz üç ölkə arasında münasibətlərin daha da dərinləşməsi və strateji əməkdaşlığın inkişafını müşahidə edirik. Hazırda Azərbaycanın Türkiyə və Pakistanla ticarət dövriyyəsi 6 milyard dollardır. Hədəf isə bunu yaxın zaman ərzində 15 milyard dollara çatdırmaqdır. Ticarət dövriyyəsi artır, sərmaye qoyuluşu genişlənir, bu da ölkələr arasında strateji münasibətlərin daha da inkişafına və dərinləşməsinə xidmət edir. Təbii ki, ölkələr beynəlxalq platformalarda, iki və daha çox tələbli münasibətlərdə bir birlərinə dəstək olur, bir birilərinin ərazi bütövlüyünü və suverenliyinin qorunmasında səylərini nümayiş etdirirlər. Aydındır ki, Azərbaycanın suverenliyini və ərazi bütövlüyünü tam dəstəkləyən və siyasi baxımdan bu istiqamətdə dəstək olan ölkələr sırasında Pakistan və Türkiyə xüsusilə seçilir. Bütün bunlar ondan xəbər verir ki, bu üç dövlət strateji əməkdaşlıq baxımından dünyada nümunəvi model formalaşdıra biliblər”.
Ayhan Ağarzayev
11:53 29.05.2025
Oxunuş sayı: 8944
