Tbilisidə Azərbaycanın Müstəqillik Gününə həsr olunmuş rəsmi qəbul keçirilib
Azərbaycanın Gürcüstandakı səfirliyinin təşkilatçılığı ilə Tbilisi şəhərində 28 May – Müstəqillik Günü münasibətilə rəsmi qəbul təşkil olunub.
Crossmedia.az xəbər verir ki, tədbirdə Gürcüstan Parlamentinin sədri Şalva Papuaşvili, parlamentin deputatları, elm və ictimaiyyət nümayəndələri, din xadimləri, Gürcüstanda akkreditə olunmuş diplomatik korpusun üzvləri, eləcə də soydaşlarımız iştirak ediblər.
Tədbirin keçirildiyi otelin foyesi və zalı Azərbaycan bayraqları, milli rəmzlər və xalçaçılıq nümunələri ilə bəzədilib.
Təntənəli mərasim Azərbaycan və Gürcüstanın dövlət himnlərinin səsləndirilməsi ilə başlayıb. Daha sonra Azərbaycanın Gürcüstandakı səfiri Faiq Quliyev çıxış edərək bildirib ki, cari il Azərbaycan və Gürcüstan dövlətləri, eləcə də region üçün tarixi əhəmiyyət daşıyır. O qeyd edib ki, 1918-ci il mayın 26-da Gürcüstan, mayın 28-də isə Azərbaycan öz dövlət müstəqilliyini elan edib və Azərbaycan Xalq Cümhuriyyətinin yaradılması barədə İstiqlal Bəyannaməsi qəbul olunub.
Səfir çıxışında Gürcüstan-Azərbaycan əlaqələrinə də toxunub. Bildirib ki, Azərbaycanın həyata keçirdiyi kompleks inkişaf strategiyasında Gürcüstanla münasibətlər xüsusi yer tutur. İki ölkə arasında strateji tərəfdaşlığın təməli 1996-cı ildə ümummilli lider Heydər Əliyevin Tbilisiyə etdiyi tarixi səfər zamanı qoyulub. Həmin səfər çərçivəsində imzalanan sənədlər ikitərəfli münasibətlərin əsas istiqamətlərini müəyyənləşdirib və bu əməkdaşlıq nəticəsində bölgədə bir sıra mühüm meqalayihələr həyata keçirilib. Nəticədə Cənubi Qafqazın geosiyasi və geoiqtisadi xəritəsində mühüm yeri formalaşıb.
Faiq Quliyev, həmçinin qeyd edib ki, 2020-ci ildə xalqla dövlətin birliyi, Ordumuzun şücaəti və Müzəffər Ali Baş Komandan Prezident İlham Əliyevin rəhbərliyi ilə Azərbaycanın 44 günlük Vətən müharibəsində əldə etdiyi Qələbə otuz il davam edən münaqişəyə son qoydu və tarixi ədalət bərpa olundu.
Gürcüstan Parlamentinin sədri Şalva Papuaşvili də çıxış edərək Azərbaycan xalqını Müstəqillik Günü münasibətilə təbrik edib. O, Azərbaycanla Gürcüstan arasında bütün sahələrdə münasibətlərin uğurla inkişaf etdiyini vurğulayıb, parlamentlərarası əməkdaşlığın bu əlaqələrin güclənməsindəki rolunu xüsusi qeyd edib.
Tədbir çərçivəsində Azərbaycan istehsalı olan məhsulların təqdim olunduğu xüsusi guşə, eləcə də ölkəmizin tarixi və füsunkar təbiətini əks etdirən rəsm əsərləri iştirakçılar tərəfindən böyük maraqla qarşılanıb.
Sonda qonaqlara milli mətbəximizə məxsus ləziz təamlar təqdim olunub.
19:16 28.05.2025
Oxunuş sayı: 894
