“Azərbaycan İslamafobiya kimi zərərli tendensiya ilə bağlı prinsipial mövqeyini davam etdirəcək” – Deputat
İslamofobiya bu gün dünyada getdikcə daha geniş vüsət alır və sistemli xarakter daşımağa başlayır. Prezident İlham Əliyev beynəlxalq konfransa müraciətində bu təhlükəli tendensiyanın təkcə ayrı-ayrı ölkələrlə məhdudlaşmadığını, bir çox regionlarda müşahidə olunduğunu bildirib. O vurğulayıb ki, İslama və müsəlmanlara qarşı qərəz, nifrət və diskriminasiya müxtəlif formalarda təzahür edir. Prezident bəzi ölkələrdə islamofobiyanın artıq dövlət siyasəti səviyyəsinə yüksəldiyini diqqətə çatdırıb.
Mövzu ilə bağlı Crossmedia.az-a açıqlama verən deputat Müşfiq Cəfərov bildirib ki, Bakıda keçirilən “İslamofobiya: Qərəzin ifşa olunması və stiqmaların dağıdılması” mövzusunda beynəlxalq konfrans dünya miqyasında xüsusi diqqət mərkəzindədir.
Deputat Müşfiq Cəfərovun sözlərinə görə, konfransa 40-a yaxın ölkədən alimlərin, beynəlxalq təşkilatların ekspertlərinin, din xadimlərinin və qeyri-hökumət təşkilatları nümayəndələrinin qatılması bu məsələnin nə qədər aktual olduğunu bir daha sübut edir.
Müşfiq Cəfərov bildirib ki, Azərbaycanın islamofobiyaya qarşı mübarizədə tutduğu prinsipial mövqe hər zaman təqdir olunub: “Bu xüsusda İslam dövlətlərinin rəhbərləri də ölkəmizin fəaliyyətini yüksək qiymətləndirir”.
Deputat vurğulayıb ki, hazırda dünyanın mənzərəsi olduqca mürəkkəbdir. Qarşıdurmalar, qanlı toqquşmalar, dini zəmində süni gərginliyin yaradılması kimi hallar islamofobiyanın açıq təzahürləridir.
Onun fikrincə, Avropada müsəlmanların təqib və təhqir olunması artıq təsadüfi hadisə deyil, müəyyən siyasi dəstəyə əsaslanan və əvvəlcədən planlaşdırılmış prosesə çevrilib: "Bu hadisələr spontan deyil, əvvəlcədən planlaşdırılmış qaydada və müəyyən siyasi dəstək əsasında baş verir”.
Deputat əlavə edib ki, bu cür hallar Qərbdə təkcə siyasi dəyərlərin deyil, həm də ideoloji, mənəvi və dini dəyərlərin aşınmaya uğradığını göstərir. Onun sözlərinə görə, bu proseslər sivilizasiyaların toqquşması tezisinin qəsdən təbliğinə xidmət edir.
Müşfiq Cəfərov qeyd edib ki, Azərbaycan müxtəlif dinlərin və xalqların nümayəndələrinin sülh və əmin-amanlıq şəraitində birgə yaşadığı bir ölkədir. Bu isə Azərbaycanın zəngin multikulturalizm və tolerantlıq ənənələrinin nəticəsidir.
O bildirib ki, Azərbaycan sivilizasiyalar arasında dialoqu təşviq etməklə qarşılıqlı əməkdaşlığa, inteqrasiyaya, sülh və təhlükəsizliyə töhfə verir. Eyni zamanda, ölkəmiz islamofobiya meyllərinə hər zaman açıq etirazını bildirir.
Deputat deyib ki, bu məsələdə dünya ictimaiyyəti, xüsusilə də müsəlman ölkələri susmamalıdır. Onun sözlərinə görə, “Azərbaycan hər zaman Avropada mövcud olan bu zərərli tendensiya ilə bağlı prinsipial mövqeyini davam etdirəcək”.
Fatimə Nəbiyeva
18:45 27.05.2025
Oxunuş sayı: 949
