“70 il ərzində xalqın müstəqillik arsuzu heç sönmədi” - DEPUTAT
Müstəqil Azərbaycan Respublikasının sələfi olan, Şərqin ilk demokratik əsaslarla qurulan Cümhuriyyəti olan Azərbaycan Xalq Cümhuriyyəti, XX əsr Azərbaycan tarixinin kuliminasiya nöqtəsi idi. 23 ay yaşamasına baxmayaraq iqtisadi, siyasi, sosial, təhsil və media sahəsində ciddi addımlar tan Azərbaycan Xalq Cümhuriyyəti dövr üçün ideal dövlət modeli yaratmışdı.
Azərbaycan Xalq Cümhuriyyətinin keçirdiyi islahatlarla bağlı Milli Məclisin deputatı Aydın Mirzəzadə Crossmedia.az-a açıqlama verib:
“28 may 1918-ci il Azərbaycan tarixində müstəsna bir yer tutur. Min illərlə möhtəşəm dövlətlərə, zəngin tarixə və yüksək mədəniyyətə sahib olan xalq çox təəssüf ki, XIX əsrin əvvəllərində öz dövlət müstəqilliyini itirdi. Təəssüf ki, həmin dövrdə xalq başqa başqa dövlətlərin tərkibində idi. Ancaq buna baxmayaraq müstəqillik arzusu cəmiyyətdə çox yüksək idi. Ayrı-ayrı mütəfəkkirlərin əsərlərində bu xüsusən qeyd olunurdu. Qısa bir zamanda müstəqil dövlətçilik cəmiyyətin bütün təbəqələri tərəfindən alqışla qarşılandı və beynəlxalq aləmdə dövlətimizi tanıtmaq cəhdləri öz nəticəsini vermişdi. Həmçinin dövlətimizin beynəlxalq aləmdə tanınmasında və suverenliyini bərpa etməsində Osmanlı imperiyasının xüsusi rolu var idi. Azərbaycan Xalq Cümhuriyyəti 23 ay yaşamasına baxmayaraq özünün ən müasir keyfiyyətlərini göstərə bildi. Çox qabaqcıl Avropa ölkələri qadınlara seçib seçilmək hüququnu onilliklər sonra verdilər amma Azərbaycan Xalq Cümhuriyyəti onlardan çox-çox əvvəl qadınlara bu hüquqları vermişdi”.
Deputat xalqın müstəqilliyə olan bağlılığından da danışıb:
“Cümhuriyyət dövründə Universitet açıldı, xaricdə mütəxəssislər yetişdirməyə xüsusi diqqət ayrıldı, ordu quruculuğu sahəsində ciddi addımlar atıldı və o dövrün iqtisadi inkişafı üçün olduqca ciddi qərarlar verildi. 1920-ci ildən sonra AXC qurucuları, ziyalı təbəqə və AXC generalları ya məhv edildi ya da repressiyaya məruz qaldı. Bununla Rusiya Azərbaycan xalqının müstəqilliyə olan inamını qırmağa çalışırdı. Eyni zamanda bundan sonra tariximizdə, ədəbiyyatımızda 23 aylıq dövlətimizi öyrənmək və təhlil etməyə böyük qadağalar qoyuldu. Bununla belə onlar Azərbaycan xalqının müstəqillik arzusunu qıra bilmədilər. Tarixin müxtəlif mərhələlərində igid oğullarımız vətənə olan bağlılıqlarını və müstəqilliyə olan inamlarını itirmədiklərini göstərirdilər. 1948-ci ildə azərbaycanlı gənclərin “İldırım” adlı təşkilat yaratması, üçrəngli bayrağımızı Qız Qalasında dalğalandırması buna bariz nümunədir. Aradan keçən zaman ərzində xalqın müstəqilliyə olan inamı getdikcə artırdı. Bu özünü yazıçılarımızın qələmində və ədəbi mühitdə də göstərirdi. Heydər Əliyevin Azərbaycana rəhbərliyi dövründə xalqımızın 70 il ərzində müstəqilliyə olan inamı və səyləri öz nəticəsini verdi. İndiki müstəqil, demokratik Azərbaycan Respublikası da illərlə Azərbaycan xalqının müstəqilliyə olan inamını və bağlılığını bu gün tam şəkildə təmin edir”.
Ayhan Ağarzayev
14:20 27.05.2025
Oxunuş sayı: 2105
