Deputat: “Azərbaycan dünyada İslomofobiyanın bütün trendlərini ifşa etməlidir”
“Azərbaycan dünyada İslomofobiyanın bütün trendlərini ifşa etməlidir”.
Bu sözləri "İslamofobiya: Qərəzin ifşa olunması və stiqmaların dağıdılması” mövzusunda keçirilən 3-cü beynəlxalq İslamofobiya ilə mübarizə” konfransı çərçivəsində Crossmedia.az-a açıqlamasında Milli Məclisin deputatı Tural Gəncəliyev deyib.
“Bildiyiniz kimi bu gün Bakıda İslamofobiya ilə mübarizə haqqında əhəmiyyətli bir beynəlxalq konfrans keçirilir. Azərbaycan islamofobiyanın ifşa edilməsi və onunla mübarizə aparılması istiqamətində çox önəmli addımlar atır. Bu gün burada keçirilən konfrans bunun sübutudur. Bizim erməni vandallarının, erməni işğalçılarının məscidlərimizi dağıtması kimi acı təcrübələrimiz var. Ona görə də biz bütün islamofobiya formalarını - Ermənistanın islamofobik addımlarından başlayaraq bu gün Avropada, Qərbdə davam edən bütün trendləri ifşa etməliyik. Təəssüflər olsun ki, bu gün ABŞ-də, Avropada bəzi siyasi dairələr maraqlıdırlar ki, müsəlmanları xristianlara qarşı, başqa dini qruplara qarşı qoyaraq ayrıseçkilik yaratsınlar, biri-birinə qarşı mübarizəyə təşviq etsinlər. Bu da məhz populist siyasətçilərin və saxta gündəliklə irəli gələn siyasi partiyaların əsas məqsədidir. Ona görə də hesab edirəm ki, Azərbaycanda keçirilən bugünkü konfransın önəmi elə bununla bağlıdır. Məhz bu trendləri, bu aspektləri danışaq, müzakirə edək, ən əhəmiyyətlisi ifşa edək və qarşısını alaq".
Deputat, həmçinin Azərbaycanın İslamofobiya ilə mübarizədə atacağı gələcək addımları da açıqlayıb: "Azərbaycan bundan sonra yenə də beynəlxalq konfransların keçirilməsi, həmkarlarımızla bu məsələlərin müzakirə edilməsi kimi fəaliyyətlərə davam edəcək. Dövlətimiz multikulturalizm mərkəzi, dövlət dini komitəsi və digər qurumların vasitəsilə islamofobiya trendlərini ifşa edəcək. Çünki Azərbaycan bu gün dünyada harmoniyanı, dözümlülüyü nümayiş etdirən, onu təşviq edən bir ölkədir. Bizim üçün islamofobiya qəbuledilməzdir. Əminəm ki, dövlətimiz qoşulmama hərəkatı, iqlim məsələləri, Fransa müstəmləkəçilik siyasəti, zorakılığa məruz qalan xalqların həyat səviyyəsinin yaxşılaşdırması və onların haqq səsinin eşidilməsi kimi məsələrlə yanaşı, məhz islamofobiyaya qarşı da öz mübarizəsini davam etdirəcək, öz addımlarını atacaq".
Səidə Abasova
19:55 26.05.2025
Oxunuş sayı: 1647
