“Xalqa xidmət etmək, hər bir azərbaycanlının Prezidenti olmaq onun həyat fəlsəfəsidir” - Deputat
Müasir dövrdə humanizm və insan hüquqlarına hörmət hər bir demokratik cəmiyyətin əsas dayaq prinsiplərindən biri kimi qəbul olunur. Azərbaycanda bu prinsiplərin tətbiqi və təşviqi dövlət siyasətinin prioritet istiqamətlərindəndir. Xüsusilə Ümummilli Lider Heydər Əliyevin hakimiyyətə qayıdışından sonra ölkədə humanist dəyərlərin bərqərar olması istiqamətində mühüm addımlar atılmışdır. Bu ənənə bu gün də Prezident İlham Əliyev tərəfindən uğurla davam etdirilir. Dövlət başçısının imzaladığı əfv və amnistiya sərəncamları isə bu siyasətin bariz nümunələrindəndir və Azərbaycan cəmiyyətində humanizmə verilən yüksək dəyəri əks etdirir.
Mövzu ilə bağlı Milli Məclisin deputatı Aydın Hüseynov Crossmedia.az-a açıqlamasında qeyd edib:
“Humanizm demokratik dəyərlərin başlıca meyarlarından sayılır. Azərbaycan hakimiyyəti cəmiyyətdə ənənələrinin təşəkkül tapması və möhkəmlənməsi üçün insan hüquq və azadlıqlarının təmin olunmasına və müdafiəsinə diqqətlə yanaşır. Ümummilli Lider Heydər Əliyevin hakimiyyətə qayıdışından sonra ənənələrin təməli qoyulub. Ulu Öndərin hakimiyyətə gəlişindən sonra atılan humanist addımlar bu gün cənab Prezident İlham Əliyev tərəfindən davam etdirilir, bu dövrdə dəfələrlə amnistiya və əfv sərəncamları imzalanıb ki, bu aktlar da xeyli sayda insana şamil olunub”.
A.Hüseynov həmçinin qeyd edib:
“Azərbaycan Prezidenti İlham Əliyev 28 May – Müstəqillik Günü ilə bağlı əfv sərəncamı imzalamaqla növbəti dəfə böyük bir humanistlik nümayiş etdirib: “Prezident bu xeyirxah addımı ilə on minlərlə vətəndaşı sevindirib, ölkədə ictimai barışı, vətəndaş-dövlət birliyini daha da möhkəmləndirib. Sərəncam azadlıqdan məhrum etmə cəzasına məhkum edilmiş 218 nəfərə şamil edilib. Prezident İlham Əliyevin imzaladığı əfv sərəncamı insanlar tərəfindən müsbət qarşılanıb, alqışlanıb. Bu, milli vəhdətin daha bir nümunəsidir. Prezident gözü yollarda qalan bir körpəni, bir ananı, bir ailəni, onlarla qohum-əqrabanı sevindirib. Bu da onu deməyə əsas verir ki, Azərbaycan bütün azadlıqların, o cümlədən insan və vətəndaş hüquq və azadlıqlarının təmin olunduğu, demokratik inkişaf yolunda əmin addımlarla irəliləyən ölkədir. Prezident İlham Əliyevin rəhbərliyi ilə ölkəmizdə həyata keçirilən dövlət siyasətinin mərkəzində vətəndaşların rifahı və mənafeyi dayanır. Azərbaycan hökumətinin məqsədi öz vətəndaşını cəzalandırmaq deyil, qanunun aliliyini gözləməklə onu etdiyi səhvdən çəkindirməkdir, maarifləndirməkdir. Əgər həbsxanada cəzalarını çəkən vətəndaşlarımız etdikləri səhvlərini başa düşüblərsə, dövlət başçımız humanizmlik göstərir və onları əfv edir. Hökumət həmişə vətəndaşlarına qarşı humanist mövqe nümayiş etdirir, onların cəmiyyət daxilində təhlükəsiz, əmin-amanlıq şəraitində yaşamalarını təmin edir. “Bu baxımdan İlham Əliyev hər bir Azərbaycan vətəndaşının Prezidentidir. Xalqa xidmət etmək, hər bir azərbaycanlının Prezidenti olmaq onun həyat fəlsəfəsidir”.
Ayhan Ağarzayev
16:00 26.05.2025
Oxunuş sayı: 9267
