Ekspert: "Azərbaycanla İran arasında strateji tərəfdaşlıq imkanları olduqca məhduddur"
İran Prezidenti Məsud Pezaşkian bu gün Azərbaycan lideri İlham Əliyevi Milli Müstəqillik Günü ilə bağlı təbrik edib. Pezaşkian təbrik edib. Təbrik məktubunda Pezaşkian bildirib ki, İran əlaqələri ortaq maraqlar çərçivəsində strateji tərəfdaşlıq səviyyəsinə qədər genişləndirmək və yüksəltmək əzmindədir.
“İran bu baxımdan nəqliyyat, elektrik enerjisi, təbii qaz ilə bağlı müxtəlif sahələrdə ortaq layihələrin tamamlanması işlərinin sürətləndirilməsinin, ticarət mübadiləsinin həcminin artırılmasının, insanlar arasında təmasların asanlaşdırılmasının önəm kəsb etdiyini vurğulayır”, - o bildirib.
Son illər Bakı ilə Tehran münasibətlərdə xüsusi dinamika müşahidə olunur. Bu dinamika fonunda Pezaşkianın məktubda yazdıqları barədə Crossmedia.az-a danışan Orta Doğu Araşdıralar Mərkəzinin sədri, siyasi şərhçi Sədrəddin Soltan söyləyib: "Azərbaycanla İran arasında strateji tərəfdaşlıq münasibətlərə yalnız əlaqələrin normallaşmasından sonra mümkün ola bilər. Bu mərhələyə qədər bir sıra vacib addımların atılması zəruridir. Azərbaycanla İran arasında münasibətlərin normallaşmasından sonra bir sıra sahələrdə – iqtisadiyyat, enerji, nəqliyyat və humanitar sahələrdə – əməkdaşlığın bərpası mümkündür. Lakin bu prosesin davamlı və real nəticələr verməsi üçün İranın Ermənistandan Azərbaycana qarşı təzyiq vasitəsi kimi istifadə etməsinə son qoyması vacibdir".
S. Soltan vurğulayıb ki, yalnız bu şərtlər təmin edildikdən sonra iki ölkə arasında etimada əsaslanan real normallaşma prosesi başlaya bilər: “Strateji tərəfdaşlıq məsələsi isə məhz bu mərhələdən sonra reallaşa bilər. Hazırkı şəraitdə isə Azərbaycanla İran arasında strateji tərəfdaşlıq imkanları olduqca məhduddur".
Bənövşə Zahidli
15:22 23.05.2025
Oxunuş sayı: 8593
