Qazaxıstan nəqliyyat naziri: AZAL təyyarəsinin qəzası ilə bağlı toplanmış materialların tədqiqatı aparılır
Azərbaycan Hava Yollarına (AZAL) məxsus təyyarənin qəzasının araşdırılması toplanmış materialların tədqiqatı mərhələsindədir.
Crossmedia.az-ın xəbərinə görə, bu barədə Qazaxıstanın Nəqliyyat naziri Marat Karabayev Senatda bildirib.
"Birinci mərhələ materialların toplanması idi, o başa çatıb. İndi ikinci mərhələdir - toplanmış materialların tədqiqatı gedir. İndi araşdırma mərhələsindəyik. Araşdırma çərçivəsində bizim mütəxəssislərimiz cəlb edilmiş xarici mütəxəssislərlə və həmçinin ICAO ilə birlikdə Bakıda, Qroznıda, həmçinin Rostov-na-Donda olublar", - M.Karabayev qeyd edib.
Nazir əlavə edib ki, materiallar tədqiqatlar üçün Qazaxıstandadır.
Xatırladaq ki, AZAL-ın Bakı-Qroznı reysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarədə olan 67 nəfərdən 38-i ölüb, 29-u sağ qalıb. İlkin məlumatlara görə, təyyarə fiziki və texniki kənar müdaxilə nəticəsində qəzaya uğrayıb.
13:10 23.05.2025
Oxunuş sayı: 544
