Azərbaycan və Qazaxıstan məhkəmə kadrlarının hazırlanması üzrə əməkdaşlığı möhkəmləndirir
Qazaxıstanın Ali Məhkəmə Şurasında Azərbaycan və Türkiyənin hakim və prokurorların hazırlanması üzrə fəaliyyət göstərən xüsusi təhsil müəssisələrinin nümayəndələri ilə görüş keçirilib.
Crossmedia.az Qazaxıstan Ali Məhkəmə Şurasının mətbuat xidmətinə istinadla xəbər verir ki, görüş iştirakçıları tərəfdaşlıq əlaqələrinin inkişafında, təcrübə mübadiləsində və birgə təhsil layihələrinin həyata keçirilməsində maraqlı olduqlarını bildiriblər.
Görüş zamanı Qazaxıstan Ali Məhkəmə-Hüquq Şurası yanında Ədliyyə Akademiyası ilə Azərbaycan Baş Prokurorluğunun Elmi-Tədris Mərkəzi arasında ədliyyə və kadr hazırlığı sahəsində əməkdaşlıq Memorandumu imzalanıb.
Ali Məhkəmə-Hüquq Şurası yanında Ədliyyə Akademiyasının prorektoru Kanat Musin Memorandumun hakimlərin hazırlanması, təcrübə keçməsi və birgə tədqiqatların aparılması sahəsində qabaqcıl təcrübə mübadiləsinə şərait yaratdığını vurğulayıb.
Azərbaycan Baş Prokurorluğu Elm və Tədris Mərkəzinin rəisi Talıb Cəfərov əlavə edib ki, imzalanmış sənəd gələcək əməkdaşlıq və qarşılıqlı faydalı təşəbbüslərin həyata keçirilməsi üçün möhkəm zəmin olacaq.
İştirakçılar qanunun aliliyinin təmin edilməsi naminə peşəkar əlaqələrin gücləndirilməsinə və qarşılıqlı fəaliyyətin davam etdirilməsinə ümidvar olduqlarını bildiriblər.
15:06 22.05.2025
Oxunuş sayı: 8777
