"Qərbi azərbaycanlıların ata-baba yurdlarına qayıdışı sülhün taleyini müəyyən edəcək" - RƏY
Azərbaycan Prezident İlham Əliyev “Qərbi Azərbaycana qayıdış insan hüquqlarının aliliyinin mühüm şərti kimi” mövzusunda beynəlxalq konfransın iştirakçılarına müraciətində bildirib ki, Qərbi Azərbaycan İcmasının beynəlxalq hüquqa uyğun dinc təşəbbüsləri təqdirəlayiqdir və dünya ictimaiyyəti tərəfindən dəstəklənir. Qərbi azərbaycanlıların təhlükəsiz və ləyaqətli şəkildə, sülh yolu ilə Ermənistandakı dədə-baba torpaqlarına qayıdışının təmin edilməsi regionda sülhün, insan hüquqlarının və barışığın bərqərar olması üçün vacib şərtdir.
Dövlət başçısı xüsusi olaraq vurğulayıb ki, Qərbi azərbaycanlıların qayıdış istəyi Ermənistana qarşı ərazi iddiası demək deyildir və Ermənistan həmin istəyi bu formada təqdim etmək cəhdlərindən əl çəkməlidir. Qayıdış reallaşana qədər bu məsələ Azərbaycanın gündəliyindən çıxmayacaqdır. Təbii ki, öz yurdlarına dönəcək Qərbi azərbaycanlılara təhlükəsizlik zəmanəti də verilməlidir. “İnanırıq ki, Qərbi azərbaycanlılar təhlükəsiz və ləyaqətli şəkildə öz doğma yurdlarına qayıdacaq və bölgədə davamlı sülh bərqərar olacaqdır”, - deyə müraciətdə qeyd edilib.
Milli Məclisin deputatı Hikmət Babaoğlu ölkə liderinin verdiyi mesajlar barədə Crossmedia.az-a açıqlamasında bildirib ki, Prezidentin mesajında Qayıdış Konsepsiyasının əsas mahiyyətini insan hüquqlarının təşkil etməsi xüsusi önəm daşıyır: “Əgər Ermənistan bu gün sözün əsl mənasında Cənubi Qafqazda dövlət funksiyası yerinə yetirmək istəyirsə, bu, yalnız hüquqa və ədalətə əsaslanan münasibətlər fonunda mümkün ola bilər.”
Deputat vurğulayıb ki, Ermənistanın mövcud olduğu coğrafiya tarixi Azərbaycan torpaqlarıdır və bu ərazilərin əzəli sakinləri – azərbaycanlılar – uzun illər boyu etnik təmizləməyə və deportasiyalara məruz qalıblar: “Qərbi azərbaycanlıların ata-baba yurdlarına qayıdışı həm də Ermənistan-Azərbaycan arasında sülhün taleyini müəyyən edəcək. Əgər Ermənistan beynəlxalq hüququn subyekti kimi tanınmaq və qonşuluq münasibətlərini qorumaq istəyirsə, ilk növbədə azərbaycanlıların pozulmuş hüquqlarının tanınması və onların geri dönüşünə şərait yaradılması vacibdir. Bu isə yalnız beynəlxalq hüquq normalarına uyğun siyasətlə mümkündür".
Zəhra Ağayeva
13:40 21.05.2025
Oxunuş sayı: 954
