Azərbaycan-İran münasibətləri yeni mərhələyə qədəm qoyur
Azərbaycan və İran arasında diplomatik münasibətlər son günlərdə yenidən gündəmə gəlib. Tərəflər qarşılıqlı səfərlər və danışıqlar yolu ilə əlaqələri da da yaxşılaşdırırlar. Enerji, ticarət və nəqliyyat sahələrində əməkdaşlıq imkanları genişlənir. Eyni zamanda, iki ölkə regionda sabitliyin təmin olunması üçün birgə fəaliyyətə maraq göstərir.
Deputat Könül Nurullayeva, Azərbaycan-İran münasibətləri haqqında Crossmedia.az-a verdiyi açıqlamasında bildirib ki, Azərbaycan bütün qonşularla, o cümlədən İranla əlaqələrin inkişafında maraqlıdır və bu siyasət bu gün də davam etdirilir. Onun sözlərinə görə, bu vaxta qədər yaranmış narazılıqlara baxmayaraq, iki ölkə arasında hər zaman yaxın qonşuluq münasibətləri, ortaq tarixi və mədəni irs mövcud olub.
K.Nurullayevanın sözlərinə görə, bir neçə həftə əvvəl İran Prezidenti Məsud Pezeşkianın Azərbaycana səfəri ikitərəfli əlaqələrdə yeni səhifə açıb. O hesab edir ki, münasibətlərin inkişafı təkcə ikitərəfli səviyyədə deyil, həm də regional təhlükəsizlik baxımından mühüm əhəmiyyət kəsb edir.
Deputat qeyd edib ki, 44 günlük Vətən müharibəsindən sonra Azərbaycanın təşəbbüsü ilə yaradılan 3+3 formatına İranın da cəlb olunması təsadüfi olmayıb. Bununla yanaşı, Azərbaycan-İran-Türkiyə və Azərbaycan-Rusiya-İran üçtərəfli əməkdaşlıq formatları da Prezident İlham Əliyevin təşəbbüsü ilə formalaşıb və hazırda uğurla davam etdirilir.
Könül Nurullayeva bildirib ki, Bakı ilə Tehran üçün prioritet məsələlərdən biri nəqliyyat sahəsində əməkdaşlığın genişləndirilməsidir. “İranla Azərbaycanın Şimal-Cənub nəqliyyat dəhlizi üzrə sıx əməkdaşlığı təkcə ikitərəfli deyil, həm də beynəlxalq logistik axınlar üçün əhəmiyyətlidir” – deputat qeyd edib.
Deputatın fikrincə, Qarabağ ərazisinin azad olunması və burada yeni infrastrukturun qurulması bu əməkdaşlıq üçün əlavə imkanlar yaradıb. İrandan yüklərin Cəbrayıl-Füzuli-Ağdam-Yevlax-Gəncə-Batumi marşrutu ilə Qara dənizə daşınması, eləcə də digər alternativ yollar regionun nəqliyyat xəritəsində Azərbaycanın rolunu artırır.
K.Nurullayeva qeyd edib ki, Ağbənd–Laçın–Kəlbəcər–Gəncə–Gürcüstan avtomobil marşrutunun tamamlanması ilə regionun nəqliyyat-logistika potensialı daha da artacaq. “Bu layihələr fonunda Ermənistanın təklif etdiyi marşrutlar aktuallığını itirir” – deyə o əlavə edib.
Deputat onu da vurğulayıb ki, Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin Tehran Dialoq Forumunda iştirakı da Azərbaycanın bölgədəki rolunu gücləndirir. Həmin səfər çərçivəsində İranın Ali Milli Təhlükəsizlik Şurasının katibi ilə görüşdə dəhliz yollarının tikintisinin sürətləndirilməsi də müzakirə olunub.
Sonda Könül Nurullayeva qeyd edib ki, Qara dənizlə Fars körfəzini birləşdirən Araz dəhlizi həm region üçün mühüm layihədir, həm də Azərbaycanın əsas hissəsini Naxçıvanla birləşdirmək baxımından xüsusi əhəmiyyət daşıyır. Astara-Astara və Astara-Rəşt dəmir yolu layihələri də İranla ticarət əlaqələrinin gücləndirilməsinə xidmət edəcək.
Fatimə Nəbiyeva
16:43 19.05.2025
Oxunuş sayı: 11350
