Parlamentari: "Ölkə üzrə bütün mənzil fondunun ümumi sahəsi son 20 il ərzində 1.6 dəfə artıb"
1990–93-cü illər mənzil fondunun ən az artım göstərdiyi dövr olub. 90-cı illərdə Ermənistanın işğalı 100 minlərlə məcburi köçkünün yerləşdirilməsini tələb edirdi. Sovetlərin süqutundan sonra təkcə sosial-iqtisadi tənəzzül deyil, mənzillə təminat sahəsində də böhran hökm sürürdü. O dövrün statistik göstəriciləri ölkəmizdə ən az mənzil və yaşayış fondunun məhz 1990-93-cü illərdə yaradıldığını sübut edir".
Crossmedia.az xəbər verir ki, bunu Sosial Tədqiqatlar Mərkəzinin İdarə Heyətinin sədri Zahid Oruc Bakı şəhərinin mənzil fonduna dair keçirilən elmi-praktik konfransda çıxışı zamanı deyib.
O qeyd edib ki, Ulu öndərin hakimiyyətə qayıdışından sonra, 1995-1996-cı illərdə dönüş baş verdi, nəhayət, tikinti sektorunun inkişafında yüksələn dinamika müşahidə olundu: "Belə ki, 2000-ci illərdə istifadəyə verilən yaşayış sahəsi 487 min m2 olduğu halda, ilk neft gəlirlərinin daxil olduğu 2005-ci ildə 1.6 milyon kvadratmetr, 2019-cu ildə ən yüksək, yəni 9.5 milyon kvadratmetr, 2022-ci ildə isə 2.8 milyon kvadratmetr təşkil edib. Sovet dövründə istifadəyə verilən yaşayış sahələrinin coğrafi bölgüsündə kəndlər əhəmiyyətli yer tuturdusa, müstəqillik illərində tendensiya dəyişdi. 1993-cü ildə istifadəyə verilən yaşayış sahələrinin 45.5%-i şəhərlərdə, 54.5%-i kənd yerində olduğu halda, 2020-ci ildə 90.3%-i şəhər yerində, 9.7%-i kənd ərazilərində olub".
Natiq söyləyib ki, ölkə üzrə bütün mənzil fondunun ümumi sahəsi son 20 il ərzində 1.6 dəfə artıb: "2003-cü 125 milyon kvadratmetr təşkil edən bütün mənzil fondu, 2023-cü ildə 200.7 milyon kvadratmetrə bərabər olub. Bunun 6%-i dövlət, 94%-i isə qeyri-dövlət mülkiyyətinə aiddir. Mənzil fondunun 93%-i və ya 187,0 mln. kv. metri əhalinin şəxsi mülkiyyətindədir. Hər il dövlət büdcəsindən təkcə zərərin ödənilməsi və təmir işləri üçün təqribən 25-28 mln. manat ayrılır. Son 10 ildə orta hesabla əhalinin hər nəfərinə düşən mənzil və ev sahəsi 17.6 kvadratmetr-dən 20.8 kvadratmetrə çatıb".
Həmayıl Şükürlü
14:39 19.05.2025
Oxunuş sayı: 579
