Azərbaycan Avropa İttifaqı üçün aparıcı tərəfdaşa çevrilir - AÇIQLAMA
Tiranada keçirilən Avropa Siyasi Birliyinin 6-cı Zirvə Toplantısı, növbəti dəfə bəzi Qərb liderlərinin ikiüzlü siyasətini ifşa etdi. Öz ölkəsində Azərbaycanın əleyhinə çıxışlar edən Fransa Prezidenti Emmanuel Makron, Prezident İlham Əliyevin qarşısında birdən-birə “sakitləşdi”, təmkinli görünməyə çalışdı. Lakin artıq gecdir – dünya ictimaiyyəti Makronun riyakarlığını və Ermənistana birtərəfli yanaşmasını çoxdan tanıyır.
Politoloq Əliqismət Bədəlov, mövzu ilə bağlı Crossmedia.az-a verdiyi açıqlamada bildirib ki, Azərbaycan öz ərazi bütövlüyünü və suverenliyini tam bərpa etdikdən sonra ölkəmizin beynəlxalq nüfuzu əhəmiyyətli dərəcədə artıb. Bunu təkcə region dövlətləri deyil, eyni zamanda dünyanın aparıcı ölkələri də qəbul edir.
Əliqismət Bədəlov qeyd edib ki, artıq dünyanın əksər ölkələri Qarabağın Azərbaycanın ayrılmaz hissəsi olduğunu rəsmən etiraf edir. Onun sözlərinə görə, Almaniya Federativ Respublikasının Prezidenti Frank-Valter Ştaynmayerin, Gürcüstan Prezidenti Mixeil Kavelaşvilinin və İran İslam Respublikasının Prezidenti Məsud Pezeşkianın Azərbaycana səfərləri zamanı Qarabağın Azərbaycana məxsus olduğunu açıq şəkildə ifadə etmələri bu reallığın təsdiqidir.
Politoloq qeyd edib ki, bu kimi bəyanatlar və siyasi dəstək Prezident İlham Əliyevin həyata keçirdiyi uğurlu daxili və xarici siyasətin nəticəsidir. Azərbaycanın ərazi bütövlüyünün dünya dövlətləri tərəfindən qəbul olunması, ölkəmizin beynəlxalq miqyasda etibarlı tərəfdaş kimi mövqeyini möhkəmləndirir.
Ə.Bədəlov vurğulayıb ki, Prezident İlham Əliyevin Albaniya Respublikasının Baş naziri Edi Rama və Avropa İttifaqı Şurasının Prezidenti Antonio Koştanın dəvəti ilə Avropa Siyasi Birliyinin 6-cı Zirvə Toplantısında iştirak etmək üçün Tiranaya səfəri xüsusi önəm daşıyır. O bildirib ki, bu zirvə 50-yə yaxın ölkənin dövlət və hökumət başçılarının iştirakı ilə keçirilən nüfuzlu tədbirdir və Azərbaycan kimi ölkələrin bu tədbirdə iştirak etməsi beynəlxalq arenada ölkəmizə olan hörmətin və marağın göstəricisidir.
Politoloq Əliqismət Bədəlov,“Zirvə çərçivəsində iştirak edən ölkələrin liderlərinin Prezident İlham Əliyevlə görüşmək üçün növbəyə dayanması, Azərbaycanın artıq güclü və söz sahibi olan ölkəyə çevrildiyini göstərir” - deyə bildirib.
O qeyd edib ki, Prezident İlham Əliyevin səfər çərçivəsində Türkiyə Prezidenti Rəcəb Tayyib Ərdoğan, İspaniyanın Baş naziri Pedro Sançes, Bosniya və Herseqovinanın Rəyasət Heyətinin sədri Jelka Cvijanic, Avropa Şurasının Baş katibi Elma Berse, Slovakiyanın Baş naziri Robert Fico ilə keçirdiyi görüşlər ölkəmizin diplomatik əlaqələrinin genişliyini və müxtəlif ölkələrlə qurduğu strateji tərəfdaşlığı nümayiş etdirir.
Politoloq bildirib ki, Tiranada Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula fon der Leyenlə keçirilən görüşlər də xüsusi əhəmiyyətə malikdir. Hər iki Avropa rəsmisi Azərbaycanın Avropa İttifaqı üçün vacib və etibarlı tərəfdaş olduğunu, xüsusilə enerji təhlükəsizliyi sahəsində göstərdiyi dəstəyi yüksək qiymətləndiriblər.
Əliqismət Bədəlov, “Antonio Koşta və Ursula fon der Leyen Azərbaycanın Avropanın enerji ehtiyaclarını qarşılamaqda oynadığı mühüm rolu xüsusi olaraq vurğuladılar və ölkəmizin Avropa İttifaqı üçün əhəmiyyətli tərəfdaş olduğunu açıq şəkildə etiraf etdilər” - deyə deyib.
Onun sözlərinə görə, bu cür beynəlxalq dəstək Azərbaycan vətəndaşları üçün qürurverici haldır və ölkəmizin sülhün, təhlükəsizliyin və dialoqun təşviqində oynadığı rolu da təsdiqləyir.
Ə.Bədəlov əlavə edib ki, Azərbaycanın Avropa İttifaqının 8 ölkəsinin enerji təminatında mühüm rol oynaması, ölkəmizin strateji əhəmiyyətə malik olduğunu göstərir. Bu fakt da onu sübut edir ki, Azərbaycan yalnız regionda deyil, bütövlükdə Avropa üçün də önəmli tərəfdaşdır.
Politoloq qeyd edib ki, zirvə toplantısında diqqət çəkən ən maraqlı məqamlardan biri də həmişə Azərbaycan əleyhinə danışan, ölkəmizə qarşı təhdidlər və qərəzli fikirlər səsləndirən Fransa Prezidenti Emmanuel Makronun İlham Əliyevə yaxınlaşıb onunla səmimi şəkildə görüşməsi oldu.
“Makronun arxada təhdidlər səsləndirib, üzbəüzdə isə İlham Əliyevlə gülümsəyərək görüşməsi onun siyasi ikiüzlülüyünü və riyakarlığını nümayiş etdirdi” - deyə Politoloq vurğulayıb.
Politoloqun fikrincə, Makronun bu davranışı, onun uzun illərdir nümayiş etdirdiyi ermənipərəst mövqeyin əsl mahiyyətini ortaya qoydu. Bədəlovun sözlərinə görə, Azərbaycan Prezidenti ilə görüşdə sanki “quzuya dönən” Makronun bu davranışı həm siyasi səhnədə, həm də ictimai rəyin gözündə Fransa rəhbərliyinin qeyri-səmimi və tərəfli mövqeyini ifşa etmiş oldu.
Ə.Bədəlov diqqətə çatdırıb ki, bu mənzərədə Ermənistanın Baş naziri Nikol Paşinyanın kənarda duraraq görüşü boynubükük izləməsi də simvolik və düşündürücü görüntü idi. Politoloq hesab edir ki, Paşinyan ümidini Makron kimi “ikiüzlü siyasi fiqurlara” bağlasa da, bu ümidin heç bir real nəticəsi olmayacaq.
Onun sözlərinə görə, yeganə çıxış yolu Azərbaycanın sülh təklifini qəbul etmək və regionda davamlı sabitlik üçün sülh müqaviləsini imzalamaqdır.
Sonda politoloq vurğulayıb ki, bu görüş və Zirvə Toplantısı bir daha sübut etdi ki, Azərbaycan Avropa İttifaqının layiqli, etibarlı və strateji əhəmiyyət daşıyan tərəfdaşlarından biridir. Azərbaycanın bu platformada iştirakı və uğurlu diplomatik fəaliyyəti onu yalnız regionda deyil, bütün dünyada nüfuzlu və aparıcı ölkələrdən birinə çevirir.
Fatimə Nəbiyeva
16:00 17.05.2025
Oxunuş sayı: 3595
