Paşinyan: “Sülh sazişi imzalanarsa, Ermənistanın ərazi iddiaları olmayacaq”
Ermənistanın Baş naziri Nikol Paşinyan Albaniyanın paytaxtı Tiranada Azərbaycan İctimai Televiziyasının müxbirinin suallarını cavablandırıb. O, ölkəsinin Azərbaycanla sülh sazişi imzalamağa hazır olduğunu bildirib. Baş nazir qeyd edib ki, bu sənəd imzalandığı təqdirdə, Ermənistan Konstitusiyası ilə bağlı ərazi iddialarına dair bütün narahatlıqlar hüquqi baxımdan aradan qalxacaq.
Crossmedia.az xəbər verir ki, Paşinyan Ermənistanın hazırda yeni Konstitusiya layihəsinin olmadığını, lakin mövcud Konstitusiyanın analiz edildiyini və burada qonşu ölkələrə qarşı hər hansı ərazi iddiasının yer almadığını vurğulayıb. Onun sözlərinə görə, bu mövqe Ermənistan Konstitusiya Məhkəməsi tərəfindən də təsdiq olunub.
Azərbaycanın sülh sazişinin imzalanması üçün irəli sürdüyü iki əsas şərtə də toxunan Paşinyan, birinci şərt — ATƏT-in Minsk Qrupunun fəaliyyətinə son verilməsi ilə razı olduqlarını deyib. O bildirib ki, bu addımın sülh sazişi ilə eyni gündə və məkanda atılması etimadın və sabitliyin möhkəmləndirilməsi baxımından daha məqsədəuyğundur.
İkinci şərtə — Ermənistan Konstitusiyasına dəyişikliklər edilməsinə gəlincə, Paşinyan qeyd edib ki, artıq razılaşdırılmış sülh sazişi layihəsində tərəflər bir-birinin ərazi bütövlüyünü tanıyır. Bu prinsip 1991-ci il Almatı Bəyannaməsinə əsaslanır və sənəddə açıq şəkildə göstərilir ki, tərəflər bir-birinə qarşı ərazi iddiaları irəli sürmür və gələcəkdə də irəli sürməyəcək.
Baş nazir əlavə edib ki, sülh sazişinə əsasən, tərəflər daxili qanunvericiliyə əsaslanaraq sənədi yerinə yetirməkdən imtina edə bilməyəcəklər. Ermənistan qanunvericiliyinə görə, bu sənəd Konstitusiya Məhkəməsində yoxlanıldıqdan sonra parlament tərəfindən ratifikasiya olunacaq və bundan sonra ölkə qanunlarından üstün hüquqi qüvvəyə malik olacaq.
Paşinyan vurğulayıb ki, əgər Azərbaycanın Konstitusiyaya dair narahatlıqları səmimidirsə, bu narahatlıqları aradan qaldırmağın ən düzgün yolu sülh sazişinin imzalanmasıdır. O, Ermənistanın da Azərbaycanın Konstitusiyasında yer alan bəzi eyhamlarla bağlı narahatlıqları olduğunu, lakin bu məsələni qabartmadıqlarını bildirib. Onun fikrincə, razılaşdırılmış sülh sazişi layihəsi bu kimi qarşılıqlı narahatlıqları aradan qaldırır.
“Biz həm sülh sazişini, həm də ATƏT-in Minsk Qrupunun buraxılması ilə bağlı birgə bəyanatı eyni vaxtda imzalamağa hazırıq. Bunu daha əvvəl də demişdim, bu gün bir daha təsdiqləyirəm”, – deyə Paşinyan vurğulayıb.
Nigar Rəhimova
13:18 16.05.2025
Oxunuş sayı: 9700
