Parisdə Ümummilli Lider Heydər Əliyevin anım mərasimi keçirilib
Fransanın paytaxtı Paris şəhərində Azərbaycan xalqının Ümummilli Lideri Heydər Əliyevin anadan olmasının 102-ci ildönümü qeyd edilib.
Crossmedia.az “Report” istinadən verir ki, tədbir Azərbaycan Respublikasının Mədəniyyət Mərkəzində təşkil olunub.
Tədbirdə çıxış edən Azərbaycanın Fransadakı səfiri Leyla Abdullayeva Heydər Əliyevin müasir və güclü Azərbaycan dövlətinin banisi olduğunu vurğulayıb. O bildirib ki, dahi lider ölkəyə ən çətin və taleyüklü bir dövrdə rəhbərlik edib, xalqı sabitliyə və inkişaf yoluna çıxardıb.
Səfir qeyd edib ki, ümummilli liderin ilk rəsmi xarici səfəri məhz Fransaya olub: “1993-cü il dekabrın 3-də Heydər Əliyev Fransaya rəsmi səfər edərək, Fransa Prezidenti Fransua Mitterran ilə dostluq, qarşılıqlı anlaşma və əməkdaşlığa dair mühüm sənədlər imzalayıb. Fransa bu baxımdan ilk seçilmiş ölkə olaraq təsadüfi deyil, düşünülmüş və müdrik siyasətin təzahürü idi”, – deyə səfir qeyd edib.
O, həmçinin Azərbaycanın əməkdar artistləri və ziyalılarının Fransada göstərdiyi fəaliyyətin iki ölkə arasında mədəni körpü yaradılmasına verdiyi töhfələri də xüsusi vurğulayıb. Eyni zamanda, yüzlərlə azərbaycanlı əsgərin İkinci dünya müharibəsi zamanı Fransa xalqının azadlığı uğrunda apardıqları mübarizəyə də toxunub.
Səfir əlavə edib ki, Azərbaycan heç zaman, hətta torpaqlarının işğal altında olduğu dövrlərdə belə, özünü qurban kimi göstərməyə çalışmamış, həmişə qürurlu və müstəqil bir mövqedən çıxış edib.
Tədbirdə çıxış edən Azərbaycanın UNESCO yanında daimi nümayəndəsi Elman Abdullayev isə bildirib ki, qurum Ümummilli Lider Heydər Əliyevin xüsusi önəm verdiyi beynəlxalq təşkilatlardan biri olub.
“Dahi öndər Azərbaycan xalqının gələcəkdə qarşılaşa biləcəyi problemləri öncədən görərək, onların həlli üçün səmərəli və uzaqgörən bir siyasət yürüdüb”. Tədbir çərçivəsində Ulu Öndər Heydər Əliyevin həyat və fəaliyyətinə həsr olunmuş sənədli film nümayiş etdirilib.
Sonda azərbaycanlı fleyta ustası Ağarəhim Quliyev tərəfindən dahi bəstəkar Tofiq Quliyevin “Səhər” adlı musiqi əsəri səsləndirilib.
20:55 09.05.2025
Oxunuş sayı: 7743
