"Azərbaycan-Vyetnam əlaqələri yeni mərhələyə başlayır" - DEPUTAT
"Qlobal siyasi arxitekturanın yenidən formalaşdığı bir dövrdə dövlətlər çoxvektorlu siyasətə üstünlük verirlər. Bu dəyişikliklər fonunda Azərbaycanın Avrasiya ölkələri ilə əlaqələrinin gücləndirilməsi xüsusi əhəmiyyət daşıyır. Xüsusilə Vyetnam Sosialist Respublikası ilə münasibətlər ölkəmizin Asiya-Sakit okean regionunda mövqeyini daha da möhkəmləndirir".
Bu fikirləri Azərbaycan Milli Məclisin deputatı Məzahir Əfəndiyev Crossmedia.az-a açıqlamasında bildirib.
Deputatın söyləyib, Azərbaycan–Vyetnam əlaqələrinin əsası 1959-cu ildə Vyetnamın o zamankı lideri Ho Şi Minin Azərbaycan SSR-ə səfəri ilə qoyulub: “Ulu Öndər Heydər Əliyevin 1983-cü ildə Vyetnama səfəri bu münasibətlərin daha da möhkəmlənməsində mühüm rol oynayıb. Rəsmi diplomatik münasibətlər isə 1992-ci ilin 23 sentyabrında qurulub. Azərbaycan və Vyetnam arasında münasibətlər qarşılıqlı hörmət və bərabərlik prinsiplərinə əsaslanır. Prezident İlham Əliyevin 2014-cü ildə Vyetnama etdiyi səfər əlaqələrin yeni mərhələyə keçidini təmin edib. Bu səfər çərçivəsində iqtisadi əməkdaşlığın genişləndirilməsi, xüsusilə Azərbaycan sahibkarları üçün əlverişli investisiya imkanlarının yaradılması məsələləri də diqqət mərkəzində olub” – deyə deputat vurğulayıb.
Parlamentarinin sözlərinə görə, son illərdə parlamentlərarası dostluq qrupları, hökumətlərarası komissiyalar və ekspert səviyyəsində aparılan müzakirələr əməkdaşlığın institusional əsaslarını möhkəmləndirib. Beynəlxalq platformalarda da əməkdaşlığın uğurla davam etdiyini bildirən M.Əfəndiyev, Azərbaycanın Qoşulmama Hərəkatına sədrliyi dövründə inkişaf etməkdə olan ölkələrin maraqlarını müdafiə etdiyini və bu siyasətin Vyetnam tərəfindən yüksək qiymətləndirildiyini vurğulayıb.
İqtisadi sahədə də mühüm addımlar atıldığını deyən Milli Məclisin
deputatı bildirib ki, Azərbaycanın neft-qaz sektoru və logistik imkanları ilə
Vyetnamın sənaye potensialı qarşılıqlı investisiya və texnologiya mübadiləsi
üçün əlverişli zəmin yaradır: “Bu əməkdaşlıq gələcəkdə daha da dərinləşə bilər.
2025-ci il mayın yeddisində Vyetnam Kommunist Partiyasının Baş katibi To Lamın
Azərbaycana səfəri bu əlaqələrin inkişafında yeni mərhələ olacaq. Bu səfər iki ölkə arasında daha fəal əməkdaşlığa
təkan verəcək. Prezident İlham Əliyev öz çıxışlarında münasibətlərin yalnız
iqtisadi sahə ilə məhdudlaşmadığını, eyni zamanda mədəni, humanitar və təhsil
istiqamətlərində də inkişaf etdiyini xüsusi vurğulayır. Heydər Əliyev Fondunun
dəstəyi ilə təhsil sahəsində mühüm layihələr reallaşdırılıb. Azərbaycan və
Vyetnam arasındakı münasibətlər regionlararası əməkdaşlığın uğurlu modelidir. Bu
əlaqələr Azərbaycanın beynəlxalq arenada oynadığı rolun, xüsusilə də sülh,
sabitlik və qarşılıqlı etimada əsaslanan siyasətinin bariz göstəricisidir”.
Fatimə Nəbiyeva
12:08 09.05.2025
Oxunuş sayı: 1459
