Deputat: "Müasir Azərbaycan dövləti Heydər Əliyevin adı ilə bilavasitə bağlıdır"
Hər xalqın tarixində elə şəxsiyyətlər olur ki, onların gördüyü işlər zamanla ölçülmür, gələcək nəsillərin yaddaşında əbədi yaşayır. Azərbaycan xalqı üçün belə bir zirvə şəxsiyyəti — müdrik dövlət xadimi, dahi lider Heydər Əliyevdir. Onun zəngin həyatı və fəaliyyəti təkcə Azərbaycan tarixinin deyil, bütövlükdə regionun taleyini dəyişmiş bir liderin yoludur. Heydər Əliyev Azərbaycan dövlətçiliyinin banisi, milli ideologiyanın memarı və xalqın gələcəyini düşünən uzaqgörən siyasətçi kimi tarixə qızıl hərflərlə yazılıb.
Bu günlərdə Ulu Öndərin anadan olmasının 102-ci ildönümü qeyd olunur. Bu, sadəcə bir tarix deyil — xalqımızın milli yaddaşının, siyasi müdrikliyinin və dövlətçilik ənənələrinin yaşadıldığı, hər il bir daha dəyərləndirilən əlamətdar gündür. Bu gün həm də bizə, müasir gənc nəslə, vətəndaşlıq borcumuzu, vətənə olan məsuliyyətimizi xatırladan gündür. Çünki Heydər Əliyev təkcə bir dövrün lideri yox, gələcəyə işıq tutan fikir adamıdır.
Onun rəhbərliyi ilə əsası qoyulan milli dövlətçilik ənənələri bu gün Azərbaycan Respublikasının möhkəm dayaqları üzərində yüksəlməsinə səbəb olub. Ulu Öndərin ideyaları və siyasi xətti bu gün də Prezident İlham Əliyev tərəfindən uğurla davam etdirilir və Azərbaycanın inkişafı onun arzuladığı istiqamətdə davam edir.
Milli Məclisin deputatı Asim Mollazadə Crossmedia.az-a açıqlamasında söyləyib ki, Heydər Əliyev müstəqil Azərbaycan dövlətinin qurucusudur. "Azərbaycanın ərazi bütövlüyünün təmin olunması üçün o, bütün əsasları yaratmışdı: "O, həm də Azərbaycan Silahlı Qüvvələrinin yaradıcısıdır. Azərbaycanın Konstitusiyasının müəllifi və əsas memarı kimi, dövlətimizin hüquqi bazasının formalaşmasında mühüm rol oynamışdır. Heydər Əliyev yalnız dövrünün siyasi lideri deyil, həm də Azərbaycanın gələcəyi üçün inkişaf istiqamətlərini müəyyən edən, dövlətçiliyimizin əsaslarını möhkəmləndirən tarixi şəxsiyyətdir. Məhz bu səbəbdən də müasir Azərbaycan dövləti Heydər Əliyevin adı ilə bilavasitə bağlıdır. Əminəm ki, “Konstitusiya və Suverenlik İli” çərçivəsində görülən işlər Azərbaycanın gələcəkdə daha da güclənməsi, ərazi bütövlüyünün tam təmin olunmasından sonra isə dünya birliyində ölkəmizin və xalqımızın layiqli yerini tutması baxımından mühüm rol oynayacaq".
Xumar Emilqızı
16:47 08.05.2025
Oxunuş sayı: 16242
