BMT-də İkinci Dünya müharibəsinin başa çatmasının 80 illiyi ilə əlaqədar olaraq anım iclası keçirilib
İkinci Dünya müharibəsinin başa çatmasının 80 illiyi ilə əlaqədar olaraq BMT Baş Assambleyasında dünya savaşının bütün qurbanlarının xatirəsinə həsr olunmuş xüsusi anım iclası keçirilib.
Crossmedia.az “Report” istinadən xəbər verir ki, iclasda Azərbaycanın BMT yanında daimi nümayəndəsi səfir Tofiq Musayev çıxış edərək bu tarixi hadisənin insanlıq üçün əhəmiyyətini vurğulayıb.
"Bu müharibə bəşəriyyətə ölçüyəgəlməz iztirablar gətirdi, milyonlarla insan həlak oldu, şəhərlər viran qaldı. O vaxt əhalisi cəmi 3,4 milyon olan Azərbaycandan 700 minə yaxın insan cəbhəyə göndərilib, onların 350 minindən çoxu həlak olub. Qələbə yalnız döyüş meydanlarında deyil, həm də arxa cəbhədə göstərilən qətiyyət və sədaqət nəticəsində mümkün oldu. Bakı neftçiləri ordunun neft məhsullarına olan tələbatının böyük hissəsini qarşılayıb, ölkədə 130-dan çox hərbi texnika və silah istehsal olunub. Bakıdakı 41 hərbi hospitalda isə 440 mindən çox yaralıya tibbi yardım göstərilib”, - T.Musayev xatırladıb.
Səfir qeyd edib ki, müharibənin yaratdığı dərslər BMT-nin yaradılmasına, beynəlxalq insan hüquqları və humanitar hüququn inkişafına səbəb olub: “Müharibə cinayətlərini araşdırmaq üçün çoxtərəfli məhkəmələrin yaradılması ədalətin siyasi iradə ilə dəstəkləndikdə nə qədər güclü təsirə malik olduğunu göstərdi”.
T. Musayev çıxışının sonunda müasir dövrdə beynəlxalq hüququn pozulduğu, köhnə münaqişələrin alovlandığı və yeni müharibələrin baş qaldırdığı bir zamanda selektivlik və ikili standartlara yol verilməməsinin vacibliyini vurğulayıb: “Sülh və təhlükəsizliyin qorunması, dövlətlərin suverenliyi və ərazi bütövlüyünə hörmət, insan hüquqlarının və ədalətin təşviqi məsələlərində prinsipial yanaşmalar əsas götürülməlidir”.
Qeyd edək ki, bu xüsusi iclas 2025-ci ilin mart ayında qəbul edilmiş qətnaməyə əsasən təşkil olunub. Qətnaməyə əsasən, İkinci Dünya müharibəsinin bütün qurbanlarının xatirəsinə 2025-ci ilin may ayının ikinci həftəsində və bundan sonra hər beş ildən bir xüsusi təntənəli iclasın keçirilməsi nəzərdə tutulur.
20:35 07.05.2025
Oxunuş sayı: 979
