Deputat : "Heydər Əliyevin əvəzsiz xidmətləri bu gün də Azərbaycanın inkişafını təmin edir”
Ulu Öndər Heydər Əliyevin doğum günü ərəfəsində müxtəlif tədbirlər, aksiyalar keçirilir. Heydər Əliyevin Azərbaycanın müstəqilliyi və dövlətçiliyinin möhkəmlənməsindəki misilsiz xidmətləri yad edilir.
Mövzuyla bağlı Milli Məclisin deputatı Pərvanə Vəliyeva Crossmedia.az-a açıqlama verib. Deputat "Azərbaycan xalqının tarixində silinməz iz qoymuş şəxsiyyət və müasir dövlətçiliyimizin memarı olan Ulu Öndər Heydər Əliyev 1923-cü ilin 10 may tarixində Naxçıvan şəhərində anadan olmuşdur. Bu gün ölkəmizdə onun doğum günü böyük ehtiramla qeyd olunur" deyib.
Deputat Pərvanə Vəliyeva bildirib ki, Heydər Əliyevin həyat və fəaliyyəti bütöv bir dövrü, məktəbi təmsil edir. Onun adı bu gün müasir, müstəqil və güclü Azərbaycanın adı ilə birgə çəkilir. P.Vəliyeva vurğulayıb ki, Heydər Əliyevin siyasi fəaliyyətinə nəzər saldıqda görürük ki, o, hələ sovet dövründə milli maraqları qətiyyətlə müdafiə edən, daim Azərbaycanı irəli aparan lider olmuşdur. 1969-cu ildə Azərbaycan Kommunist Partiyası Mərkəzi Komitəsinin birinci katibi seçildikdən sonra respublikada iqtisadi, elmi, təhsil və mədəni sahələrdə əhəmiyyətli dəyişikliklər baş vermişdir.
Deputat qeyd edib ki, Heydər Əliyevin ən böyük xidmətləri müstəqil Azərbaycanın qurulması və qorunması sahəsində olmuşdur. 1990-cı illərin əvvəllərində ölkənin içində olduğu ağır siyasi və iqtisadi böhran, vətəndaş qarşıdurması, xarici təhlükələr fonunda xalqın tələbi ilə 1993-cü ildə yenidən hakimiyyətə qayıdan Heydər Əliyev Azərbaycanı parçalanmaq təhlükəsindən xilas etmişdir.
Milli Məclisin deputatı Pərvanə Vəliyeva, həmçinin Heydər Əliyevin təşəbbüsü ilə həyata keçirilən neft strategiyasını yüksək qiymətləndirib. O, 1994-cü ildə “Əsrin müqaviləsi”ni imzalamaqla Azərbaycanın beynəlxalq enerji bazarına inteqrasiyasını sürətləndirmişdir. 20 sentyabr 1994-cü ildə Bakıdakı “Gülüstan” sarayında dünyanın 11 neft şirkəti ilə imzalanmış bu müqavilə Azərbaycanın Xəzər dənizindəki “Azəri-Çıraq-Günəşli” yataqlarının birgə işlənməsini nəzərdə tuturdu.
Pərvanə Vəliyeva bildirib ki, Heydər Əliyev təhsili millətin gələcəyi kimi qiymətləndirirdi. Hələ Sovet hakimiyyətinin dövründə o, Azərbaycandan minlərlə gəncin SSRİ-nin qabaqcıl ali məktəblərinə, xüsusən Moskva və Leninqrada şəhərlərində oxumağa göndərilməsinə şərait yaratmışdır.
Deputat, Ulu Öndərin xarici siyasət sahəsindəki uğurlarını da qeyd edib. Heydər Əliyev Azərbaycanın beynəlxalq aləmdə tanınması və mövqeyinin möhkəmləndirilməsi üçün balanslaşdırılmış və çoxvektorlu xarici siyasət yürütmüşdür. O, həmçinin Qarabağ münaqişəsinin sülh yolu ilə həllinə çalışmış və atəşkəs rejimini 1994-cü ildə imzalamışdır.
Deputat Pərvanə Vəliyeva, Heydər Əliyevin siyasi kursunun bu gün də Prezident İlham Əliyev tərəfindən uğurla davam etdirildiyini qeyd edib. Onun sözlərinə görə, Azərbaycanın bugünkü inkişafı, beynəlxalq uğurları, ərazi bütövlüyünün bərpası məhz Heydər Əliyev ideyalarının parlaq nəticələridir.
Deputat vurğulayıb ki, Azərbaycan xalqı yaşadıqca Ulu Öndərin əziz xatirəsi qəlblərdə daim yaşayacaqdır. O, həmçinin bildirib ki, bu gün hər kəs kimi o da Heydər Əliyevi ehtiramla anaraq onun ideyalarına sadiq qalmağı, dövlətimizi, dilimizi və mədəniyyətimizi daim uca tutmağı özünə borc bilir.
Fatimə Nəbiyeva
16:57 07.05.2025
Oxunuş sayı: 14658
