Baş Prokurorluq jurnalistlər üçün treninq təşkil edib
İnformasiya texnologiyalarının sürətli inkişafı insan hüquq və azadlıqlarının müdafiəsi sahəsində cinayət təqibi orqanları, media subyektləri və vətəndaş cəmiyyəti institutları arasında qarşılıqlı əlaqələrin qurulmasını və birgə layihələrin həyata keçirilməsini labüd edir. Bu səbəbdən media subyektləri və vətəndaş cəmiyyəti institutları ilə Baş Prokurorluq müntəzəm əlaqədədir, müasir çağırışlara cavab verən tədbirlər keçirilir.
Crossmedia.az xəbər verir ki, növbəti treninq mayın 6-da Baş Prokurorluğun mətbuat xidməti və Elm-Tədris Mərkəzinin birgə təşkilatçılığı ilə “İnsan hüquq və azadlıqlarının müdafiəsində cinayət təqibi ilə media institutlarının qarşılıqlı əlaqələri” mövzusunda təşkil olunub.
Tədbirdə televiziya kanallarının, informasiya agentliklərinin, xəbər saytlarının və müxtəlif qəzetlərin əməkdaşları, eləcə də hüquq təhsili alan tələbələr iştirak ediblər.
Treninq brifinq, dəyirmi masa və təqdimat şəklində təşkil olunub, media və prokurorluq orqanları arasında qarşılıqlı əlaqənin müxtəlif aspektlərini əhatə edib. Təqsirsizlik prezumpsiyasının mediada qorunmasının əhəmiyyəti, bu prinsipin pozulmasının hüquqi və sosial fəsadları, həmçinin ictimaiyyətin obyektiv məlumatlandırılmasının vacibliyi vurğulanıb. Prokurorluq əməkdaşları və media nümayəndələri arasında effektiv informasiya mübadiləsinin hüquqi əsasları və etik çərçivəsi geniş müzakirə olunub.
Tədbir çərçivəsində Baş Prokurorluq tərəfindən hazırlanmış “Jurnalistlər üçün hüquqi terminlər lüğəti” adlı nəşrin təqdimatı da keçirilib. Kitab jurnalistlərin hüquqi mövzularda daha dəqiq və anlaşıqlı məlumat verməsinə kömək etmək məqsədi daşıyır.
“Sosial media və media savadlılığı” mövzusunda keçirilən sessiyalarda rəsmi məlumatların hazırlanması, yayım standartları və ictimai maraq doğuran məsələlərin dəqiqliklə çatdırılması ilə bağlı praktiki tövsiyələr verilib.
Sonda iştirakçılar Baş Prokurorluğun inzibati binalar kompleksi ilə tanış olublar.
Qeyd edək ki, treninq prokurorluq orqanlarında şəffaflığın və ictimaiyyətlə açıq ünsiyyətin gücləndirilməsi istiqamətində həyata keçirilən kompleks tədbirlərin tərkib hissəsi kimi təşkil olunub.
17:43 06.05.2025
Oxunuş sayı: 13053
