Rusiyadan Azərbaycana qarşı növbəti təxribat? - "Münasibətlər gərgindir"
Azərbaycan Milli Məclisinin deputatı Azər Badamovun Moskvadan deportasiya olunmasını rəsmi Bakı narazılıqla qarşılanıb. Azərbaycan Xarici İşlər Nazirliyi bu hadisəni “qeyri-dost" yanaşma kimi qiymətləndirib və Rusiyanın bu addımını ikitərəfli münasibətlərə zidd hesab edib. Qurumun açıqlamasında qeyd olunub ki, belə davranışlar qarşılıqlı etimada və əməkdaşlığa xələl gətirir. Hadisənin səbəbləri ilə bağlı hələlik rəsmi Moskva tərəfindən ətraflı izahat verilməyib. Azərbaycan tərəfi məsələ ilə bağlı diplomatik kanallar vasitəsilə izahat tələb etdiyini bildirib.
Azərbaycanlı parlamentariyə qarşı atılan bu addım barədə Crossmedia.az-a danışan politoloq Elçin Xalidbəyli bunun siyasi motivli olduğunu qeyd edib: "Azərbaycan və Rusiya arasında münasibətlərdəki gərginlik hələ də davam edir. Bu vəziyyətin əsas səbəblərindən biri Azərbaycanın sərnişin təyyarəsinin Rusiya səmasında vurulmasından sonra yaranan soyuqluğun hələ də aradan qalxmamasıdır. Son hadisə, əlbəttə, siyasi motiv daşıyır və Azərbaycan-Rusiya əlaqələrinin hazırkı vəziyyətini aydın şəkildə ortaya qoyur. Azərbaycanlı deputatın deportasiyası da, xüsusilə də Kremlin Azərbaycana qarşı qərəzli mövqeyinin ifadəsi kimi dəyərləndirilməlidir".
Politoloq bildirib ki, deputat Rusiyanın maraqlarına zidd heç bir hərəkət etməyib, ictimaiyyətdə qalmaqala səbəb olacaq açıqlamalar verməyib: "Buna baxmayaraq, Rusiya parlamentinin bir çox üzvü açıq şəkildə Azərbaycana qarşı ittihamlar və qərəzli açıqlamalar səsləndirməyə davam edir. Kimsə deportasiya olunmalı və ya qara siyahıya salınmalıdrsa, bunu Azərbaycan Xarici İşlər Nazirliyi həyata keçirməlidir. Onun fikrincə, ilk növbədə Rusiya parlamentinin rəhbər şəxslərindən biri olan və ermənipərəst mövqeyi ilə tanınan deputat Konstantin Zatulin həmin siyahıya salınmalıdır. Baş verənlər Azərbaycan və Rusiya arasında münasibətlərin hələ də normallaşmadığını və Kremlin Azərbaycana qarşı qərəzli münasibətini açıq şəkildə göstərir".
Fatimə Nəbiyeva
15:34 05.05.2025
Oxunuş sayı: 10132
