Pezeşkianın mühüm Azərbaycan səfəri: İranla münasibətlərdə yeni mərhələ
İran Prezidenti Məsud Pezeşkian Azərbaycanda səfərdədir.
Onun azərbaycanli həmkarı İlham Əliyevlə görüşü gözlənilir. Bir çox analitikin
fikrincə, liderlərin görüşü ikitərəfli münasibətlərdəki bəzi qaranlıq məqamların
aradan qalxmasında mühüm rol oynaya bilər.
Keçmiş xarici işlər naziri Tofiq Zülfüqarov səfərdən gözləntiləri barədə fikirlərini Crossmedia.az-la bölüşüb: “İnanıram ki, bu səfər Azərbaycan-İran münasibətlərində müsbət dinamikanın daha da güclənməsinə təkan verəcək. Bildiyiniz kimi, bir müddət əvvəl Azərbaycan-İran arasında müəyyən böhran yaşandə. Bəzi qüvvələr Bakı ilə Tehran arasında qarşıdurma yaratmağa çalışırdılar. Xarici dairələr də bu vəziyyəti daha da gərginləşdirmək üçün müxtəlif addımlar atırdılar. İranın əvvəlki hakimiyyəti dövründə Azərbaycanla münasiblərdə tədricən müsbət dinamika müşahidə olunurdu. Amma bu proses sonacan davam etmədi və münasibətlərdə müəyyən geriləmələr oldu”.
Müsahibimiz qeyd edib ki, bu səfər əvvəlki dinamikanın bərpası
üçün mühüm rol oynaya bilər: “İranın yeni prezidenti səfərdən əvvəl Azərbaycan
televiziyasına verdiyi müsahibədə dostluq və əməkdaşlıq haqqında xoş fikirlər səsləndirdi.
Azərbaycan həmişə İranla yaxşı münasibətlərə önəm verib. Tarixi və digər sahələrdəki
əlaqələr iki ölkə üçün xüsusi əhəmiyyət daşıyır. İnanıram ki, bu səfər iki ölkə
arasında yeni addımların atılmasına səbəb olacaq və münasibətlərdə yeni bir mərhələ
açılacaq”.
Bönövşə Zahidli
14:00 28.04.2025
Oxunuş sayı: 1149
