Qlobal Cənub QHT Platforması ölkəmizin növbəti uğurudur - DEPUTAT
Aprelin 28-də Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı Forumda qərar qəbul edilib. Qərara əsasən, Qlobal Cənub QHT Platforması təsis olunub.
Milli Məclisin deputatı Pərvanə Vəliyeva məsələ ilə bağlı Crossmedia.az-a açıqlama verib. Deputat bildirib ki, Vətən Müharibəsində qələbə qazanaraq bölgədə yeni bir reallıq yaradıldıqdan sonra Azərbaycan beynəlxalq əlaqələrini daha geniş coğrafiyada genişləndirməkdədir: “Müstəqil və balanslı xarici siyasət həyata keçirən Azərbaycan Qlobal Cənub ilə daha geniş tərəfdaşlığa üstünlük verir”.
Pərvanə Vəliyeva vurğulayıb ki, bu günkü dünyamız yeni hökmranlıq formaları ilə üzləşir - iqtisadi, ekoloji, digital - lakin xalqlar və millətlər arasında həmrəyliyin güclü olması hər zamankindən daha vacibdir: “Qlobal Cənub təkcə yüksəlmir, o, innovasiya, dözümlülük və ədalətə sadiq bir yanaşma ilə gələcəyi formalaşdırır”.
Prezident İlham Əliyev keçən noyabr ayında Bakıda keçirilən COP29-da ən yüksək səviyyədə təmsil olunan Afrika dövlətlərinin başçıları ilə görüşlər keçirdi. Həmçinin, son illərdə Misir, Əlcəzair, Kongo və Somali kimi ölkələrə qarşılıqlı yüksək səviyyəli səfərlər və Keniya ilə münasibətlərin genişlənməsi həyata keçirilib. Hazırda Azərbaycanın Tunis, Cənubi Afrika Respublikası, Misir, Mərakeş, Liviya və Keniya kimi Afrika ölkələri ilə iqtisadiyyat, neft və qaz, mədənçilik, müdafiə sənayesi, minatəmizləmə və təhsil sahələrində əməkdaşlığı inkişaf etdirmək üçün böyük potensial mövcuddur. Eyni zamanda, humanitar yardımın çatdırılması və "ASAN xidmət" modelinin Afrika ölkələrində tətbiqi sahəsində də əməkdaşlıq imkanları vardır.
Deputat sonda qeyd edib ki, bu gün ölkəmizdə keçirilən Qlobal Cənub-cənub əməkdaşlığı üzrə beynəlxalq konfrans - təsis konfransı keçirilir: “110-dan çox ölkənin vətəndaş cəmiyyəti təşkilatları Qlobal Cənubun Bandunq prinsiplərinin yenidən doğuşunu, yeni nəfəsdə implementasiyasını görürük. Qlobal Cənubun vətəndaş cəmiyyəti həmrəyliyinin gücləndirilməsi ölkəmizdə QHT sektorunun növbəti uğurudur”.
Həmayıl Şükürlü
13:42 28.04.2025
Oxunuş sayı: 20407
