Hikmət Babaoğlu: “Çox təəssüf ki, siyasət Şəhriyarın şeirləri qədər aydın, gözəl və birmənalı deyil”
İran prezidenti Məsud Pezeşkianın Azərbaycana ilk rəsmi səfəri regionda maraqla qarşılanıb. Səfər həm Azərbaycan, həm də İran ictimaiyyətində ciddi müzakirələrə səbəb olub.
Milli Məclisin deputatı Hikmət Babaoğlu səfəri Crossmedia.az-a şərh edərək onun əhəmiyyətini, perspektivlərini və gözləntilərlə bağlı ehtiyatlı yanaşma zərurətini vurğulayıb. Deputatın fikrincə, istənilən halda qonşu ölkə İranın prezidentinin Azərbaycana səfəri müsbət hadisədir: "Azərbaycanda və İranda bu səfər gözlənilən bir səfər idi. Çünki İranın regionda Azərbaycana qarşı aqressiv davranışlarından, Zəngəzur dəhlizini qırmızı xətt elan etməsindən, İranda Azərbaycan səfirliyinə edilən hücumlardan və bu gün də İran ərazisindən Ermənistana Hindistanda istehsal olunan silahların daşındığı bir vaxtda belə bir səfər əlbəttə ki, mühüm əhəmiyyət kəsb edir".
Deputat bildirib ki, bütün bunların müzakirə olunması üçün yaxşı bir platforma yaranıb. Lakin onun sözlərinə görə, əsas məsələ gözlənilən nəticənin əldə olunub-olunmamasıdır.
Hikmət Babaoğlu vurğulayıb ki, İran prezidenti Məsud Pezeşkianın Azərbaycan Televiziyasına verdiyi qısa müsahibədən sonra aydın olub ki, İranın Azərbaycan siyasətində köhnə tezislər yenidən təkrar olunur: “Çox təəssüf ki, siyasət Şəhriyarın şeirləri qədər aydın, gözəl və birmənalı deyil. Ona görə də, doğrusu, mən belə mövqedən, İran prezidentinin Azərbaycan Televiziyasına verdiyi müsahibədə səsləndirdiyi fikirlərdən sonra İran və Azərbaycan münasibətlərində yeni və fövqəladə nəyinsə baş verəcəyini gözləmirəm".
Buna baxmayaraq, Hikmət Babaoğlu müzakirə olunmalı məsələlərin çox olduğunu vurğulayıb və ümid etdiyini bildirib ki, bu məsələlərin müzakirəsi konkret nəticələr üçün zəmin yaradacaq.
Həmayıl Şükürlü
10:20 28.04.2025
Oxunuş sayı: 4025
