Azərbaycan, Pakistan və Türkiyə xarici işlər nazirləri arasında telefon danışığı olub
Azərbaycan xarici işlər naziri Ceyhun Bayramov, Pakistan xarici işlər naziri Məhəmməd İshaq Dar və Türkiyə xarici işlər naziri Hakan Fidan arasında telefon danışığı baş tutub.
Crossmedia.az xəbər verir ki, söhbət zamanı Pakistan ilə Hindistan arasında son günlərdə sərhəddə baş verən hadisələr və bölgədə yaranmış gərginlik müzakirə olunub. Tərəflər regional sabitliyin və təhlükəsizliyin qorunmasının vacibliyini vurğulayıb, mövcud vəziyyətin diplomatik yollarla və beynəlxalq hüquq prinsiplərinə uyğun şəkildə həll olunmasının əhəmiyyətini qeyd ediblər.
Bununla yanaşı, üç ölkə arasında əməkdaşlığın möhkəmləndirilməsi və beynəlxalq platformalarda qarşılıqlı dəstəyin davam etdirilməsi məsələləri də müzakirə mövzusu olub.
Nazirlər regional və qlobal çağırışlar fonunda əlaqələndirilmiş səylərin artırılmasının vacibliyini qeyd edərək, gələcəkdə də bu cür məsləhətləşmələrin davam etdiriləcəyini bildiriblər.
Mədinə Cəlilova
22:03 26.04.2025
Oxunuş sayı: 1070
