"Bu, Azərbaycan diplomatiyasının uğurudur" - DEPUTAT
Azərbaycanın Xarici İşlər Nazirliyi Ermənistanın Beynəlxalq Ədalət Məhkəməsinə təqdim etdiyi iddia ilə bağlı qərarı yüksək qiymətləndirib. Ermənistan mühakimə edilən 15 erməninin hüquqlarının pozulduğunu iddia edərək Azərbaycana qarşı müraciət etmişdi. Lakin Beynəlxalq Ədalət Məhkəməsi bu iddianı rədd edərək Azərbaycanın mövqeyinin əsaslı olduğunu təsdiqlədi. Xarici İşlər Nazirliyi məhkəmənin qərarını ədalətin təntənəsi kimi dəyərləndirib və bunun Azərbaycanın beynəlxalq hüquqa əsaslanan siyasətinin növbəti uğuru olduğunu vurğulayıb.
Mövzu ilə bağlı Deputat Tənzilə Rüstəmxanlı Crossmedia.az-a açıqlama verib.
Deputat Tənzilə Rüstəmxanlı Avropa İnsan Haqları Məhkəməsinin Azərbaycanla bağlı çıxardığı son qərarı şərh edib. O bildirib ki, bu çox təqdir olunacaq bir hadisədir. Çünki uzun illərdir Avropanın bütün dövlətlərinin senatorları, parlamentləri və məhkəmələri, obyektiv olsalar belə, Azərbaycanın əleyhinə, Ermənistanın isə lehinə qərarlar çıxarıblar.
Tənzilə Rüstəmxanlı qeyd edib ki, artıq bəzi həqiqətləri görməzdən gəlmək mümkün deyil və Avropa İnsan Haqları Məhkəməsinin də bu həqiqətləri nəzərə alması təbii bir nəticədir. Onun sözlərinə görə, Ermənistanın Qarabağ müharibəsindən sonrakı davranışı, insan haqlarını pozması, Qərbi Azərbaycan məsələsində dirəniş göstərməsi və barış anlaşmasını imzalamaması Ermənistanın əsl mahiyyətini Avropaya açıb göstərdi.
Deputat əlavə edib ki, bu hadisə Azərbaycanın Prezidentinin rəhbərliyi altında aparılan xarici siyasətin və Xarici İşlər Nazirliyinin fəaliyyətinin uğurlu nəticəsidir. O bildirib: “Ədalət yerini tapmışdır və belə də olmalı idi. Biz bundan sonra da yorulmadan, pəs etmədən ədalətin bərqərar olması üçün çalışmalıyıq.”
Tənzilə Rüstəmxanlı vurğulayıb ki, mübarizədən vaz keçmədən uğur əldə etmək mümkündür. O, bu qərarı Azərbaycanın dövlət başçısının və Xarici İşlər Nazirliyinin böyük uğuru hesab etdiyini söyləyib.
Sonda deputat qeyd edib ki, Avropa dəyərlərinə – hüququn üstünlüyünə və insan haqlarına – həmişə böyük önəm verilib. “Bəlkə də uzun illərdən sonra Avropa bir dəfə də olsun öz dəyərlərini qoruyub saxlaya bildi,” – deyə Tənzilə Rüstəmxanlı vurğulayıb.
Fatimə Nəbiyeva
14:57 26.04.2025
Oxunuş sayı: 10002
