Bütün Avropa təsisatları Azərbaycana qarşı qərəzli münasibət göstəriblər - DEPUTAT
Prezident İlham Əliyev Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallası qəbul edərkən bildirib ki, Azərbaycan Aİ-nin etibarlı tərəfdaşıdır. O, Cənub Qaz Dəhlizinin artıq 4 ildir fəaliyyət göstərdiyini və Avropanın enerji təchizatında əhəmiyyətli rol oynadığını qeyd edib. Hazırda Azərbaycan Aİ-yə üzv 8 ölkə də daxil olmaqla, Avropanın 10 ölkəsinə qaz ixrac edir. Prezident ölkənin bərpa olunan enerji sahəsində də böyük potensiala sahib olduğunu, xüsusilə Xəzər dənizindəki külək enerjisi ehtiyatlarını vurğulayıb. Eyni zamanda, Azərbaycan Mərkəzi Asiya ilə Transxəzər enerji dəhlizinin inkişafında və Gürcüstan, Rumıniya, Macarıstan, Bolqarıstan kimi ölkələrin iştirak etdiyi layihələrdə mühüm rol oynayır.
Bu barədə Crossmedia.az-a danışan Milli Məclisin deputatı Ceyhun Məmmədov bir müddətdir ki, münasibətlərdə Azərbaycandan asılı olmayan gərginliyin olduğunu qeyd edib: "Təəssüf ki, bütün Avropa təsisatları davamlı olaraq Ermənistanın yanında olaraq Azərbaycana qarşı qərəzli münasibət göstəriblər. Biz bunu bütün istiqamətlərdə görürdük. Buna görə də münasibətlərdə müəyyən bir gərginlik var idi. Bu səfərdən sonra münasibətlərdə yeni bir mərhələnin başlanması gözlənilir".
Deputat Azərbaycanın istəyi mövzusuna da toxunub: "Azərbaycanın istəyi ondan ibarətdir ki, bizə qarşı olan qərəzə, ədalətsizliyə, ikili standartlara son qoyulmalıdır. Azərbaycan 10-dan artıq Avropa ölkəsi ilə strateji müttəfiqlik haqqında sənəd imzalayıb. Əlaqələrimiz davamlı olaraq inkişaf edir. Azərbaycan əlaqələrin inkişafında maraqlıdır. Amma eyni zamanda Azərbaycan bizə qarşı olan ikili standartlara, qərəzə və ədalətsizliyə də son qoyulmasını tələb edir. Ümid edirik ki, bu səfərdən sonra əlaqələrimizdə yeni bir mərhələ başlayacaq. Ölkəmizə qarşı olan ədalətsiz, qərəzli, ikili standartlara da son qoyulacaq. Bu məsələ daha çox Ermənistandan, Avropadan asılıdır. Onlar buna əməl edərlərsə, əlaqələrimiz daha da inkişaf edəcək və güclənəcək".
Fatimə Məmmədova
19:35 25.04.2025
Oxunuş sayı: 11800
