Azərbaycan-Çin münasibətləri strateji mərhələyə keçdi – Deputat
Azərbaycan ilə Çin Xalq Respublikası arasında diplomatik münasibətlər son illərdə mühüm inkişaf mərhələsinə qədəm qoyub. İki ölkə arasında əməkdaşlıq yalnız iqtisadi deyil, siyasi və humanitar sahələri də əhatə edərək strateji tərəfdaşlıq səviyyəsinə yüksəlib. Prezident İlham Əliyevin Çinə son rəsmi səfəri bu münasibətlərin yeni mərhələyə keçdiyinin bariz nümunəsi oldu.
Milli Məclisin deputatı Azər Allahveranov Crossmedia.az-a açıqlamasında Prezident İlham Əliyevin Çin Xalq Respublikasına rəsmi səfərini yüksək qiymətləndirib. Deputat səfəri “olduqca vacib və tarixi” adlandıraraq, iki ölkə arasında münasibətlərin son illərdə kulminasiya nöqtəsinə çatdığını bildirib.
Onun sözlərinə görə, artıq Azərbaycan ilə Çin arasında əlaqələr hərtərəfli strateji tərəfdaşlıq xarakteri daşıyır. Bu xüsusiyyət imzalanmış sənədlərdə də öz əksini tapıb. Azər Allahveranov qeyd edib ki, 33 illik diplomatik münasibətlər ərzində əməkdaşlıq daim yüksələn xətlə inkişaf edib və bu səfər dostluq və qarşılıqlı etimadın növbəti göstəricisidir.
Deputatın sözlərinə görə, səfər çərçivəsində beynəlxalq təşkilatlar çərçivəsində əməkdaşlıq məsələləri xüsusi diqqət mərkəzində olub. Çin Xalq Respublikasının Sədri Si Cinpin Prezident İlham Əliyevi bu ilin avqust ayında keçiriləcək Şanxay Əməkdaşlıq Təşkilatının tədbirinə və həmçinin Faşizm üzərində qələbənin 80 illiyi münasibətilə keçiriləcək yubiley mərasiminə dəvət edib.
Səfər zamanı Orta Dəhlizin əhəmiyyəti və yükdaşımaların artırılması, eləcə də nəqliyyat, texnologiya və humanitar sahələrdə əməkdaşlıq müzakirə olunub. Azər Allahveranovun sözlərinə görə, bu istiqamətdə Çin şirkətləri ilə konkret danışıqlar aparılır və yeni əməkdaşlıq imkanları nəzərdən keçirilir.
Deputat əlavə edib ki, Çin Prezidenti görüş zamanı İlham Əliyevin müdrik rəhbərliyi ilə Azərbaycanın əldə etdiyi uğurları xüsusi vurğulayıb və bu siyasəti dəstəklədiyini bəyan edib.
Səfər çərçivəsində qəbul olunan birgə bəyanatda isə Çin tərəfinin Qlobal Təhlükəsizlik Təşəbbüsü, Qlobal İnkişaf Təşəbbüsü və Qlobal Sivilizasiyalar Təşəbbüsü kimi beynəlxalq platformalara Azərbaycanın dəstəyini yüksək qiymətləndirdiyi göstərilib.
Toğrul Əhmədzadə
16:00 23.04.2025
Oxunuş sayı: 16839
