"Azərbaycan-Çin münasibətləri yüksələn xətlə inkişaf edir" - Deputat
"Çin və Azərbaycan rəsmi olaraq strateji tərəfdaş ölkələrdirlər. 2024-cü ilin yayında Azərbaycan Prezidenti İlham Əliyevlə Çinin Sədri Si Cinpinin görüşündən sonra strateji tərəfdaşlıq üzrə müvafiq Bəyannamə qəbul edilib və bu, ikitərəfli əlaqələrdə çox mühüm siyasi addım kimi dəyərləndirilir".
Bu sözləri Milli Məclisin deputatı Aydın Hüseynov Azərbaycan Prezidenti İlham Əliyevun Çinin "Sinxua" agentliyinə müsahibəsində səsləndirdiyi fikirlərlə bağlı Crossmedia.az-a açıqlamasında deyib.
"Strateji tərəfdaşlıq üçün bəzi kriteriyalar var ki, onlardan ən əsası qarşılıqlı etimad və yüksəksəviyyəli əməkdaşlıqdır. Azərbaycanla Şanxay Əməkdaşlıq Təşkilatı və BRICS-in bütün üzv dövlətləri ilə dost münasibətləri var. Müasir nəqliyyat infrastrukturuna malik Azərbaycan Şərqdən Qərbə gedən yolun üzərində yerləşir. Azərbaycan Prezidenti İlham Əliyevin Çinin Sinxua agentliyinə verdiyi müsahibəsində də bir sıra beynəlxalq əhəmiyyətli layihələrdə Çin dövləti ilə birgə işin nəticələri və qarşıda duran vacib məsələlər barəsində fikirlər səsləndirilib”, - o söyləyib.
Deputat qeyd edib ki, Çin dünyanın ən çox dinamik inkişaf edən ölkələrindəndir: “Si Cinpinin müdrik rəhbərliyi altında Çin iqtisadi uğura imza atıb, dünyanın ən güclü və qabaqcıl ölkəsinə çevrilib. Uğurlu iqtisadi model ölkənin beynəlxalq arenada mövqelərini daha da möhkəmləndirib. Azərbaycan Prezidenti Çində iki dəfə - 2014 və 2015-ci illərdə işgüzar səfərdə olub, 2019-cu ildə isə Pekində keçirilən İkinci “Kəmər və yol” beynəlxalq əməkdaşlıq forumunda iştirak edib. Rəsmi görüşlər və səmərəli müzakirələrdə sonra bir daha vurğulanıb ki, qədim tarixə və xeyirxah ənənələrə əsaslanan Azərbaycan-Çin münasibətləri yüksələn xətlə inkişaf edir, iki ölkə arasındakı strateji tərəfdaşlıq yeni müsbət məzmunla zənginləşir. Qarşılıqlı hörmət və etimad ikitərəfli münasibətlərin dərinləşməsində misilsiz rol oynayır. Prezident İlham Əliyev Çinin Sinxua agentliyinə məxsusi müsahibəsində qeyd etdiyi kimi, iki ölkə başçısı arasında Astanada keçirilən görüş və onun yekunlarına dair qəbul edilən Birgə Bəyannamə tarixi hadisədir və Azərbaycan-Çin münasibətlərində yeni səhifə açır.
Fatimə Məmmədova
15:49 22.04.2025
Oxunuş sayı: 11553
