Papa: "Gəlin, Ermənistan və Azərbaycan arasında sülh müqaviləsi üçün dua edək"
Katolik dünyasının ruhani lideri Papa Fransisk Pasxa mesajında Qəzzada atəşkəs, Ukraynada isə ədalətli və davamlı sülh çağırışı edib. Vatikanın Müqəddəs Pyotr meydanında keçirilən Pasxa mərasimində iştirak edən Papa səhhətindəki problemlərə görə ibadətə rəhbərlik etməsə də, əlil arabası ilə meydana çıxaraq xalqı salamlayıb.
Crossmedia.az xarici mediaya istinadən xəbər verir ki, Papa adətən özünün səsləndirdiyi, lakin bu dəfə köməkçisinin oxuduğu ənənəvi “Urbi et Orbi” çıxışında dünyada sülhə ehtiyac duyulan bölgələrə diqqət çəkib. O, Qəzzada yaşanan humanitar böhranı “dəhşətli və alçaldıcı” adlandırıb:
“Müharibə edən tərəflərə səslənirəm: atəşkəs elan edin, girovları azad edin və insanların uzunmüddətli sülhə ehtiyacını nəzərə alın”.
Cənubi Qafqazla bağlı Papa belə bir mesaj verib:
“Gəlin, Ermənistan və Azərbaycan arasında sülh müqaviləsinin imzalanması və həyata keçirilməsi üçün dua edək.”
Afrikadakı zorakılıq və münaqişələrə də toxunan Papa Konqo, Sudan və Cənubi Sudan xalqlarına sülh və əmin-amanlıq arzulayıb.
Sülhün yalnız gerçək silahsızlanma ilə mümkün olduğunu vurğulayan Papa bildirib:
“Həqiqi tərksilah olmadan sülh mümkün deyil. Hər bir xalqın öz müdafiəsini təmin etmə zərurəti ümumi silahlanma yarışına çevrilməməlidir.”
İmmiqrasiya məsələsində də həssas mövqeyini qoruyan Papa fərqli həyat tərzi və adətlərə malik insanlara hörmət və etimadın vacibliyini vurğulayıb:
“Çünki hər kəs Tanrının övladıdır.”
Papa Ukrayna ilə bağlı isə bu sözləri deyib:
“Pasxa bayramı Ukraynaya ədalətli və davamlı sülh gətirsin. Bütün tərəfləri bu istiqamətdə səylərini artırmağa çağırıram”.
Livan və Suriya xristian icmalarına da müraciət edən Papa regionun sabitliyi və bu icmaların ölkələrinin gələcəyində fəal rol oynaması üçün dua etdiyini bildirib. O, Yəməndə davam edən humanitar böhranı da xatırladaraq, “Dünyanın ən pis və uzun sürən böhranlarından biri” kimi xarakterizə edib və tərəfləri dialoqa çağırıb.
Meydanda toplaşan insanlar Papanın çağırışlarını alqışlarla qarşılayıb.
Aybəniz Səfərova
16:08 20.04.2025
Oxunuş sayı: 13588
