Bəhreyn qəzetində ADA forumu haqqında məqalə dərc edilib
Bəhreyn Krallığının ingilis dilində nəşr olunan “The Daily Tribune News of Bahrain” qəzetində “Yeni dünya nizamına doğru” sərlövhəli məqalə dərc edilib.
Crossmedia.az xəbər verir ki, Azərbaycan səfiri Şahin Abdullayevin müəllifi olduğu məqalədə aprelin 9-da ADA Universitetində Azərbaycan Prezidenti İlham Əliyevin iştirakı ilə keçirilən “Yeni dünya nizamına doğru” adlı beynəlxalq forumundan bəhs edilib və bu tədbirin Azərbaycanın yeni qlobal düzənin formalaşmasında fəal iştirak edən subyekt kimi mövqeyini konseptual və simvolik şəkildə ortaya qoyduğu bildirilib.
Yazıda vurğulanır ki, Azərbaycan Prezidenti İlham Əliyevin forumda etdiyi çıxış yalnız region ölkələrinə deyil, həm də beynəlxalq ictimaiyyətə ünvanlanan ciddi mesaj idi. Prezident İlham Əliyevin səsləndirdiyi fikirlər, Ermənistanla normallaşma prosesinin konturlarını, mümkün sülh sazişinin şərtlərini və regionda gələcək əməkdaşlıq imkanlarını aydın şəkildə ortaya qoyur. Bu çıxış həm də Azərbaycanın geosiyasi baxışının, regional transformasiya layihələrinin və təhlükəsizlik arxitekturasının konturlarını müəyyənləşdirir.
Məqalədə hazırda Azərbaycanın regional enerji və nəqliyyat mərkəzinə çevrildiyi, Ermənistanın bu imkanlardan kənarda qalaraq həm iqtisadi resurslardan, həm də geosiyasi təsirdən məhrum olduğu diqqətə çatdırılıb. Müəllif bildirib ki, sözügedən Forumda Prezident İlham Əliyevin çıxışı təkcə diplomatik bəyanat deyil, həm də postmünaqişə dövrü üçün strateji yol xəritəsidir. Azərbaycan öz üzərinə düşəni açıq şəkildə ifadə edir: sülh istəyi var, amma bu, güzəşt yox, hüquq və reallıq üzərində qurulmalıdır.
Sülh sazişinin imzalanması tarixi bir mərhələ ola bilər, lakin onun reallaşması üçün etimad quruculuğu, mərhələli iqtisadi əməkdaşlıq və qarşılıqlı siyasi iradə vacibdir. Ermənistan bu çağırışlara cavab verərsə, Cənubi Qafqazda inteqrasiya olunmuş, dayanıqlı və proqnozlaşdırılan gələcək mümkündür.
Səfir Ş.Abdullayev məqaləsində 2023-cü ildə Azərbaycanın Avropa İttifaqına 8 milyard kubmetrdən çox qaz ixrac etdiyini, ölkəmizin infrastruktur layihələrinə milyardlarla sərmayə yatırdığını və bütün bunların Bakını enerji sabitliyinin təminatçısına çevirdiyini vurğulayıb. Müəllif məqaləsinin sonunda Azərbaycanın artıq proseslərin iştirakçısı yox, yeni dövrün memarlarından olduğunu və baş tutan forumun dəyişən qlobal reallığı düzgün ifadə etdiyini oxucuların diqqətinə çatdırıb.
09:10 16.04.2025
Oxunuş sayı: 9946
