“Dünya vətəndaşı” kimi yetişdirilən gənclər faktiki olaraq robotlaşdırılmış insanlara çevrilir” - AÇIQLAMA
Azərbaycan Respublikasının Prezidenti İlham Əliyev, yerli televiziya kanallarına verdiyi müsahibəsində Avropa Komissiyası ilə olan əlaqələrin gələcək inkişafını müzakirə edib. Prezident, ötən ilin Azərbaycanın xarici siyasəti üçün xüsusilə çətin və məyus edici olduğunu qeyd edib. O, Avropa İttifaqının normallaşma prosesində birmənalı olaraq Ermənistanın tərəfini tutduğunu vurğulayaraq, bunun nəticəsində Azərbaycan ilə Avropa arasında münasibətlərin gərginləşdiyini bildirib. Cənab Prezident, belə bir vəziyyətdə Avropa ilə əlaqələrin gələcəyini proqnozlaşdırmağın olduqca çətin olduğunu ifadə edib. O, münasibətlərin inkişafı üçün tərəflərin daha obyektiv və balanslı yanaşmalarına ehtiyac olduğunu qeyd edərək, bu yanaşmanın Azərbaycanın beynəlxalq aləmdə daha müstəqil və güclü mövqeyini qorumağa yönəldilmiş bir mesaj olduğunu vurğulayıb.
“Azərbaycan Prezidenti yerli mediaya verdiyi müsahibəsində müasir dövrdə qüdrət qazanmış güclü Azərbaycanın yenidən dünyaya təqdimatını etdi. O, vurğuladı ki, bu gün müstəqil Azərbaycan geniş coğrafiyada, Fransa və Suriyadan tutmuş Yeni Kaledoniya və Mayot adalarına qədər təsir gücünə malikdir. Bu, Azərbaycanın beynəlxalq münasibətlər sistemindəki yerinin və rolunun başa düşülməsi baxımından da mühüm fikirlərdir”.
Bu sözləri deputat Hikmət Babaoğlu Crossmedia.az-a verdiyi açıqlaması zamanı bildirib: “Prezident həmçinin Azərbaycan-Avropa İttifaqı münasibətlərinə toxunaraq bildirdi ki, ölkəmiz yalnız milli maraqları təmin edən və suveren iradəsinə hörmət edən tərəfdaşlarla əməkdaşlıq edir. O vurğuladı ki, hazırkı beynəlxalq münasibətlər sistemində müstəqil dövlət iradəsindən danışırıqsa, Azərbaycanın milli mövqeyinin qorunması əsas şərtdir. Prezident qeyd etdi ki, Azərbaycan Avropa İttifaqı ilə münasibətlərə daim diqqət ayırır və bu gün də bu diqqəti davam etdirir. Avropa İttifaqı Azərbaycanın ən vacib ticarət tərəfdaşıdır və həyata keçirilən qlobal layihələrin əksəriyyətində Avropa İttifaqı tərəfdaş kimi iştirak edir”.
Deputat həmçinin onu da vurğulayıb ki, bununla yanaşı, Prezident, Ermənistan və Azərbaycan arasında sülh məsələsində Avropa İttifaqının tərəfsizliyini qoruya bilmədiyini və bu səbəbdən vasitəçi rolunda çıxış edə bilməyəcəyini bildirdi: “Buna baxmayaraq, Azərbaycan-Avropa İttifaqı münasibətləri gələcəkdə də inkişaf edəcəkdir. Dövlət başçısı qeyd etdi ki, bəzi Avropa strukturlarının, o cümlədən Avropa Parlamenti və Avropa Şurasının qeyri-obyektiv mövqeləri, Azərbaycanın milli maraqlarına uyğun gəlmir. Lakin Azərbaycan bu cür hallara müvafiq adekvat münasibət göstərməyə qadirdir”.
H.Babaoğlu əlavə edib ki, Prezident İlham Əliyev müsahibəsində qloballaşmanın təsirləri və milli suverenlik üzərində yaratdığı təhlükələrə də diqqət çəkib: “O bildirdi ki, qloballaşma milli dövlətlərin suverenliyini sarsıdaraq bunu yeni bir sistem kimi təqdim edir. Bu proses çərçivəsində milli dəyərlərdən və mənəvi düşüncələrdən məhrum, “dünya vətəndaşı” kimi yetişdirilən gənclər faktiki olaraq robotlaşdırılmış insanlara çevrilir. Belə insanlar nə milli dövlətə, nə də qlobal cəmiyyətə faydalı vətəndaş ola bilərlər”.
Deputat onu da vurğulayıb ki, Azərbaycan Prezidenti bəzi qeyri-hökumət təşkilatlarının gənclərə ayrılan qrant layihələrindən də danışıb: “O, bu layihələrin milli vətənpərvərlik ruhunda tərbiyə prosesinə kömək etmədiyini, əksinə, vətəndaşlarımızı və gənclərimizi öz milli maraqlarımıza qarşı çevirmək məqsədi güddüyünü qeyd etdi. Onun fikrincə, belə layihələr yalnız şəffaf şəkildə həyata keçirilməlidir. Azərbaycan bu məsələdə prinsipial mövqe tutur və qrant alan subyektlər barədə məlumatlar ictimaiyyətə açıqlanır. Cənab Prezidentin bu məsələlərə toxunması Azərbaycanın milli maraqlarını qorumaq və inkişaf etdirmək yolunda strateji yanaşmasını bir daha nümayiş etdirdi”.
Aytac Şirinzadə
13:57 08.01.2025
Oxunuş sayı: 13032
