Sabiq prezidentə qarşı məhkəmə prosesi başlayır: bu məsələdə ittiham olunur
Fransanın keçmiş prezidenti Nikola Sarkozi Paris məhkəməsində 2007-ci il seçki kampaniyasının Liviya lideri Müəmmər Qəddafi tərəfindən qanunsuz maliyyələşdirilməsi iddiası ilə üzləşir. 69 yaşlı eks-prezident təqsirli bilinərsə, 10 ilədək həbs və 375 min avro məbləğində cərimə ilə cəzalandırıla bilər. Bu, Sarkozinin siyasi karyerasına və keçmişinə dair yeni qalmaqallı bir səhifə açır.
Mövzu ilə bağlı Crossmedia.az-a açıqlama verən hüquqşünas Əlövsət Allahverdiyev bildirib ki, keçmiş dövlət başçılarının cinayət ittihamları ilə üzləşməsi demokratiyalar üçün ciddi risklər yarada bilər.
“Bu mübahisəli epizodlar siyasi qütbləşməni gücləndirə bilər və müstəqil institutlar tərəfindən düzgün idarə olunmasa, hüquq-mühafizə orqanları və məhkəmələrin siyasi opponentlərə qarşı bir alətə çevrilməsi təəssüratı yaradaraq qanunun aliliyini sarsıda bilər. Bu mənada keçmiş dövlət başçılarının cinayət məsuliyyətinə cəlb olunması dövlətlər üçün arzuolunan deyil,” – deyə Allahverdiyev vurğulayıb.
Hüquqşünas həmçinin qeyd edib ki, hazırda prezidentlər üçün impiçment yolu ilə məsuliyyətə cəlb olunmaq mexanizmi dövlətlərin konstitusiyalarında mövcuddur, lakin keçmiş prezidentlərlə bağlı belə bir vahid qayda yoxdur.
“Diqqət yetirsək görərik ki, ABŞ keçmiş prezidentlərdən heç birini bu günə qədər cinayət məsuliyyətinə cəlb etməyib. ABŞ bu məsələyə nüfuz prizmasından yanaşır. Bu, onu deməyə əsas verir ki, keçmiş prezidentlərin məsuliyyətə cəlb olunması beynəlxalq hüquqdan daha çox dövlətlərin milli qanunvericiliyinə əsaslanır. Bu məsələ o halda beynəlxalq hüquqla tənzimlənir ki, dövlət və ya hökumət başçıları vəzifədə olduqları və ya vəzifədən getdikləri dövrlərdə soyqırımı, müharibə cinayətləri, insanlıq əleyhinə cinayətlər, təcavüz cinayəti törətdiklərinə və ya törədilməsinə şərait yaratmış olsunlar. Bu halda onlar beynəlxalq cinayət məsuliyyətinə cəlb olunurlar.” – deyə hüquqşünas əlavə edib.
Allahverdiyev həmçinin vurğulayıb ki, müasir beynəlxalq cinayət hüququ artıq funksional toxunulmazlığı ləğv edərək bu şəxslərin cəzadan yayınmasının qarşısını alıb.
Nihat Tahirov
08:28 07.01.2025
Oxunuş sayı: 7446
