Azərbaycan Mərkəzi Asiyanın enerji xəritəsində rolunu genişləndirir: Neft və yaşıl enerji dəhlizi
Azərbaycanın Mərkəzi Asiya dövlətləri ilə enerji əməkdaşlığında yeni imkanlar formalaşır. Prezident İlham Əliyev Türkmənbaşı şəhərində Azərbaycan və Mərkəzi Asiya Dövlət Başçılarının 8-ci Məşvərət görüşündə bildirib ki, Azərbaycan Mərkəzi Asiyadan enerji resurslarının beynəlxalq bazarlara tranzitində mühüm rol oynayır. Dövlət başçısı qeyd edib ki, Türkmənistan və Qazaxıstan neftinin Azərbaycan ərazisindən nəqli həyata keçirilir və bu daşımaların həcmi artır.
Prezident İlham Əliyev enerji əməkdaşlığının yalnız neft tranziti ilə məhdudlaşmadığını da vurğulayıb. Onun sözlərinə görə, bərpa olunan enerji sahəsində də Azərbaycan, Qazaxıstan və Özbəkistan arasında əməkdaşlıq genişlənir və ölkələr yaşıl enerji dəhlizinin yaradılması üzrə birgə iş aparırlar. Bu istiqamət Azərbaycanın həm Mərkəzi Asiya enerji resurslarının beynəlxalq bazarlara çıxarılmasında, həm də gələcəkdə elektrik enerjisi ticarətində tranzit və bağlantı imkanlarını genişləndirməsi baxımından əhəmiyyət daşıyır.
Mövzu ilə bağlı Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili Crossmedia.az-a açıqlamasında bildirib ki, Prezident İlham Əliyevin qeyd etdiyi enerji əməkdaşlığı Azərbaycan üçün əlavə iqtisadi imkanlar yaradır:
"Mərkəzi Asiya neftinin Azərbaycan üzərindən daha böyük həcmdə daşınması tranzit gəlirlərinin artmasına, liman və boru kəmərlərinin imkanlarından daha səmərəli istifadəyə şərait yarada bilər. Bu proses nəqliyyat və xidmət sahələrində əlavə sifarişlərin yaranmasına, yeni investisiyaların cəlb edilməsinə və iş yerlərinin artmasına imkan verə bilər. Azərbaycanın enerji tranzitində qazancı yalnız daşınma haqqı ilə məhdudlaşmır. Ölkə üzərindən beynəlxalq bazarlara çıxarılan enerji həcmi artdıqca Azərbaycanın həm istehsalçılar, həm də alıcılar üçün əhəmiyyəti yüksəlir. Bu isə uzunmüddətli iqtisadi tərəfdaşlıqların möhkəmlənməsinə imkan yaradır".
Deputat vurğulayıb ki, Qazaxıstan və Özbəkistanla yaşıl enerji dəhlizinin yaradılması enerji əməkdaşlığının gələcəyə hesablanmış istiqamətlərindən biridir: “Layihənin reallaşması Azərbaycanın elektrik enerjisinin ötürülməsi və ticarətində daha geniş rol oynamasına imkan verə bilər. Əsas məqsəd coğrafi mövqeyimizi davamlı gəlirə, investisiyaya və iqtisadi fəallığa çevirməkdir”.
Zeynəb Həsən
17:00 08.10.2026
Oxunuş sayı: 154
