Türkiyənin müdafiə sənayesindən NATO daxilində tarixi ixrac uğuru
Avropanın aparıcı müdafiə nəşrlərindən biri olan ˝Defence Industry Europe˝ Türkiyənin müdafiə sənayesinin NATO daxilində artan roluna diqqət çəkib.
Crossmedia.az xəbər verir ki, nəşr ASELSAN tərəfindən hazırlanan sistemlərlə təchiz olunan Rumıniyanın müasir döyüş gəmisini Türkiyə müdafiə sənayesi üçün mühüm ixrac uğuru kimi qiymətləndirib.
Məlumata görə, ASELSAN-ın istehsalı olan radar, atəş idarəetmə, elektro-optik və peyk rabitəsi sistemləri Rumıniya Hərbi Dəniz Qüvvələrinin xidmətə qəbul etdiyi Contraamiral August Roman korvetinə inteqrasiya edilib.
Analizdə bunun Türkiyədə inşa edilən bir döyüş gəmisinin ilk dəfə Avropa İttifaqı və NATO üzvü ölkəyə ixrac edilməsi baxımından mühüm mərhələ olduğu vurğulanıb.
ASELSAN sistemləri diqqət çəkib
Gəmiyə CENK 200 üçölçülü axtarış radarı, AKREP 100-N atəş idarəetmə radarı, AHTAPOT 100 elektro-optik kəşfiyyat və hədəfləmə sistemi, ACROSAT 3210M X-Band peyk rabitəsi sistemi və KARETTA 500 GPS maneələrinə qarşı qoruma sistemi quraşdırılıb.
Nəşrin məlumatına görə, bu texnologiyalar eyni platformada müşahidə, hədəf aşkarlanması, dəqiq zərbə imkanları, təhlükəsiz rabitə və elektron müharibə qabiliyyətlərini birləşdirir.
Texnoloji imkanlar ön plana çıxır
CENK 200 radarı yüzlərlə kilometr məsafədə hava və dəniz hədəflərini eyni anda izləyə bilən aktiv fazalı AESA texnologiyasına malik üçölçülü radar kimi təqdim olunur.
AKREP 100-N raket və artilleriya sistemləri üçün yüksək dəqiqlikli izləmə və atəş idarəetməsi təmin edir. AHTAPOT 100 isə gündüz, gecə və termal görüntüləmə imkanları ilə uzaq məsafəli kəşfiyyat və hədəf tanıma funksiyalarını yerinə yetirir.
ACROSAT 3210M gəminin fasiləsiz peyk rabitəsi imkanlarını artırır, KARETTA 500 isə GPS siqnallarına qarşı elektron müdaxilələr zamanı naviqasiya təhlükəsizliyini qoruyur.
Türkiyə NATO bazarında mövqeyini gücləndirir
Defence Industry Europe yazıb ki, Rumıniyanın 223 milyon avroluq hökumətlərarası razılaşma çərçivəsində əldə etdiyi korvet ölkənin ən müasir döyüş gəmilərindən biri olacaq.
Nəşr bu layihənin ASELSAN-ın Avropa bazarındakı mövqeyini gücləndirdiyini və Türkiyə müdafiə texnologiyalarının NATO ölkələrinin hərbi dəniz modernləşdirmə layihələrində daha çox görünməyə başladığını qeyd edib.
22:38 22.08.2026
Oxunuş sayı: 66
