Yəhya Rəhim Səfəvi: ABŞ terror qruplarını silahlandırmışdı
İranın ali dini rəhbərinin müşaviri Yəhya Rəhim Səfəvi ABŞ-ni İranla müharibə zamanı terror qruplaşmalarını silahlandırmaqda ittiham edib.
Crossmedia.az xəbər verir ki, bu barədə İran KİV-i məlumat yayıb.
Səfəvinin sözlərinə görə, müharibənin ilk günlərində İraqla sərhəddə təxminən 15 min terrorçuya ABŞ tərəfindən silah verildiyi barədə məlumat əldə edilib.
"Müharibə başlayanda məlumat aldıq ki, İraqla sərhəddə 15 minə yaxın terror qruplaşması üzvünə ABŞ silah verib. Həmin vaxt İranın müxtəlif bölgələri ağır bombardmana məruz qalırdı. Mərhum ali dini rəhbər dərhal mənə bu məsələ ilə məşğul olmağı tapşırdı", – deyə o bildirib.
Onun sözlərinə görə, daha sonra İraq rəhbərliyi, eləcə də Ərbil və Süleymaniyə rəsmiləri ilə əlaqə saxlanılıb. Səfəvi bildirib ki, qarşı tərəf əvvəlcə bu məsələdən xəbərsiz olduğunu bəyan edib.
O iddia edib ki, silahlı qruplaşmaların bir hissəsi Suriyadan, bəziləri isə Türkiyə ərazisindən İraqa gəlib.
Səfəvi əlavə edib ki, İran həmin qruplaşmalara qarşı pilotsuz uçuş aparatları ilə dörd zərbə endirib, daha sonra isə Ərbildəki hərbi baza və hava limanı vurulub.
Onun iddiasına görə, hava limanına zərbələr zamanı eniş etməli olan ABŞ-yə məxsus təyyarə bunu həyata keçirə bilməyərək geri qayıdıb. Səfəvi həmçinin bildirib ki, İran ərazisinə daxil olmağa çalışan quru qüvvələri hava və quru zərbələrindən sonra ağır itkilər verərək geri çəkiliblər.
16:14 20.07.2026
Oxunuş sayı: 68
