Britaniyada dəmir yolu işçiləri nadir bir Roma sikkəsi tapıb
Böyük Britaniyada yeni dəmir yolu xəttinin tikintisi zamanı arxeoloqlar nadir Roma sikkəsi və təxminən iki min il yaşı olan digər qədim artefaktlar aşkar ediblər.
Crossmedia.az xəbər verir ki, "Fox News" bu barədə məlumat yayıb.
Tapıntılar Oksford və Kembric şəhərlərini birləşdirəcək dəmir yolu xəttinin inşa edildiyi Bedfordşir və Kembricşir qraflıqlarında aparılan arxeoloji qazıntılar zamanı üzə çıxıb.
Ən qiymətli tapıntılardan biri təxminən 1740 il yaşı olan və Roma imperatoru Karausinin adını daşıyan sikkə olub. "East West Rail" şirkətinin məlumatına görə, sikkə uzun illər torpaq altında qalmasına baxmayaraq, yaxşı vəziyyətdə qorunub.
Şirkətin tarixi irsin qorunması üzrə rəhbəri Mayk Kort bildirib ki, arxeoloqlar qədim abidələrin aşkar olunacağını gözləsələr də, bəzi tapıntılar onlar üçün gözlənilməz olub. Onun sözlərinə görə, geofiziki tədqiqatlar ayrı-ayrı əşyaları, kremasiya məzarlarını və dəfn yerlərini əvvəlcədən müəyyən etməyə imkan vermir.
Sikkə Roma yaşayış məskəninin və kənd təsərrüfatı fəaliyyətinin izləri ilə birlikdə tapılıb. Qazıntılar zamanı quyular, xəndəklər və taxta dirəklərin qalıqları da aşkar edilib. Mütəxəssislərin sözlərinə görə, belə obyektlərdə tapılan keramika nümunələri və sikkələr abidələrin yaşını müəyyən etməyə kömək edir.
Araşdırmalar göstərib ki, tapılan obyektlər Dəmir dövründən Roma hakimiyyəti dövrünədək müxtəlif tarixi mərhələlərə aiddir. Arxeoloqlar layihə başa çatanadək Böyük Britaniyanın tarix və tarixəqədərki dövrlərinin əksəriyyətini əhatə edən yeni tapıntılar əldə edəcəklərinə ümid edirlər.
23:28 19.07.2026
Oxunuş sayı: 75
