Gündəm
Bu gün Dövlət Qulluqçularının Peşə Bayramı Günüdür
Azərbaycan Respublikasının Prezidenti cənab İlham Əliyevin 25 may 2006-cı il tarixli Sərəncamına əsasən, hər il iyunun 23-ü ölkəmizdə Dövlət Qulluqçularının Peşə Bayramı Günü kimi qeyd edilir.
Crossmedia.az xəbər verir ki, dövlət qulluğu Azərbaycanda qədim ənənələrə malikdir. Tarix boyu xalqımızın qurduğu dövlətlərdə idarəetmə sistemi formalaşmış, dövlətə xidmət edən insanlar ölkənin inkişafında mühüm rol oynamışlar.
Müstəqillik dövründə dövlət qulluğu sahəsində mühüm yeniliklər həyata keçirilib. Bu istiqamətdə ən önəmli addımlardan biri 2000-ci il iyulun 21-də "Dövlət qulluğu haqqında" Qanunun qəbul edilməsi olub. Həmin qanun dövlət qulluğunun əsas prinsiplərini müəyyən edib, dövlət qulluqçularının hüquq və vəzifələrini daha aydın şəkildə tənzimləyib.
Ümummilli lider Heydər Əliyevin dövlət idarəçiliyi sahəsində gördüyü işlər Azərbaycanda müasir dövlət qulluğu sisteminin formalaşmasında mühüm rol oynayıb. Bu siyasət bu gün Prezident İlham Əliyev tərəfindən uğurla davam etdirilir və dövlət idarəçiliyinin daha da təkmilləşdirilməsinə xidmət edir.
Dövlət qulluqçusu olmaq böyük məsuliyyətdir. Dövlətə və vətəndaşlara vicdanla xidmət etmək, qanunlara əməl etmək, insanlara diqqət və qayğı ilə yanaşmaq hər bir dövlət qulluqçusunun əsas vəzifəsidir. Onların fəaliyyəti vətəndaşların dövlətə olan etimadının möhkəmlənməsində mühüm əhəmiyyət daşıyır.
Dövlət Qulluqçularının Peşə Bayramı Günü münasibətilə bütün dövlət qulluqçularını ürəkdən təbrik edir, onlara möhkəm cansağlığı, işlərində uğurlar və yeni nailiyyətlər arzulayırıq
Fatimə Məmmədova
12:15 23.06.2026
Oxunuş sayı: 334
