Azərbaycan səhiyyəsi Avropa standartlarına uyğunlaşdırılır - Professor
Müasir dövrdə səhiyyə sahəsində beynəlxalq əməkdaşlıq yalnız tibbi xidmətlərin inkişafı deyil, həm də idarəetmə, innovasiya və insan resurslarının gücləndirilməsi baxımından xüsusi əhəmiyyət daşıyır. Bu kontekstdə Azərbaycan və Yunanıstan arasında səhiyyə sahəsində əməkdaşlıq perspektivlərinin müzakirəsi iki ölkə arasında əlaqələrin yeni istiqamətlər üzrə genişlənməsi kimi qiymətləndirilir. Ekspertlər hesab edir ki, qarşılıqlı təcrübə mübadiləsi səhiyyə sistemlərinin daha effektiv təşkili, tibbi xidmətlərin keyfiyyətinin artırılması və beynəlxalq standartların tətbiqi baxımından mühüm imkanlar yarada bilər. Bu əməkdaşlığın gələcəkdə hər iki ölkənin səhiyyə sektoruna hansı yenilikləri və üstünlükləri gətirəcəyi isə maraq doğuran əsas məsələlərdən biridir.
Mövzu ilə bağlı professor, tibb elmləri doktoru Adil Qeybulla Crossmedia.az-a açıqlama verib:
“Azərbaycan qloballaşan dünyanın bir hissəsi olmalıdır və əgər biz Qərb institutlarına, Qərb təcrübəsinə inteqrasiya etməyə çalışırıqsa, səhiyyə sistemimizi də beynəlxalq və müasir standartlara uyğun qurmalıyıq. İstər Yunanıstan olsun, istər digər Avropa ölkələri — hansı ölkələrlə əməkdaşlıq ediriksə, səhiyyə sistemimiz də həmin əməkdaşlıq səviyyəsinə uyğun olmalıdır. Yəni beynəlxalq standartlara cavab verməlidir. Bu standartlar artıq uzun illər ərzində formalaşıb, sınaqdan çıxıb və praktik nəticələr verib. Dünyanın inkişaf etmiş ölkələrinin səhiyyə modelləri müəyyən təcrübə üzərində qurulub. Almaniyanın, İngiltərənin, Yunanıstanın və digər inkişaf etmiş ölkələrin səhiyyə sistemləri bu baxımdan öyrənilməli və Azərbaycan da bu təcrübələrdən faydalanmalıdır”.
Professor əlavə edib ki, söhbət yalnız tibbi xidmətin özündən getmir: “Buraya səhiyyənin idarə olunması, təşkilati modeli, xidmətlərin əlçatanlığı, keyfiyyətə nəzarət mexanizmləri və ümumilikdə sistemin quruluşu daxildir. Bütün bunlar beynəlxalq normalar və dünya səhiyyə praktikasına uyğun şəkildə formalaşdırılmalıdır. Eyni zamanda, səhiyyə modelinin qurulması zamanı beynəlxalq qurumların, xüsusilə də dünya səhiyyə sahəsində qəbul edilmiş tövsiyələrin nəzərə alınması vacibdir. Çünki həm idarəetmədə, həm təşkilatlanmada, həm də səhiyyə xidmətlərinin bütün mərhələlərində beynəlxalq standartlara uyğunluq əməkdaşlığın və inkişafın əsas şərtlərindən biridir”.
Ayhan
19:00 10.06.2026
Oxunuş sayı: 53
