Ermənistanda seçki yox, Azərbaycan müzakirə olunur – İlham Əliyevin adı 104 dəfə çəkilib
Ermənistanda keçirilən siyasi debatlar gözlənilməz statistika ilə diqqət çəkib. Belə ki, debatlar zamanı Azərbaycan və Prezident İlham Əliyevin adı ümumilikdə 104 dəfə səsləndirilib. Bu rəqəm isə təkcə siyasi ritorikanın deyil, həm də Ermənistanın gündəminin hansı istiqamətdə formalaşdığını göstərən mühüm göstəricidir. Diqqət çəkən əsas məqamlardan biri isə debat iştirakçılarının ölkədaxili sosial-iqtisadi problemlərdən, daxili siyasi çəkişmələrdən və seçkiqabağı vədlərdən daha çox Azərbaycanla bağlı məsələlər üzərində dayanması olub.
Müzakirələr zamanı "Azərbaycan nə edəcək?", "Prezident İlham Əliyev nə dedi?" və "Azərbaycana necə cavab verilməlidir?" kimi suallar əsas gündəm mövzusuna çevrilib.
Bu barədə Crossmedia.az-a danışan Azad Vətən Partiyasının sədri Akif Nağı Azərbaycanın artıq regionda ciddi faktora çevrildiyini bildirib:
"Bu, Azərbaycanın uğurlu siyasəti nəticəsində baş verib. Həm Azərbaycan xarici siyasətdə uğurlar əldə edib, həm də daxili siyasəti bir çox ölkələr üçün nümunəyə çevrilib. Eyni zamanda, Azərbaycanın Qarabağda əldə etdiyi qələbə unikal hadisə oldu. Dünyanın diqqəti bu məsələyə yönəldi ki, Azərbaycan necə oldu arxasında böyük qüvvələrin dayandığı Ermənistan üzərində qələbə qazandı. Təpədən dırnağa qədər silahlanmış Ermənistan Azərbaycanın qarşısında dayanmışdı. Cəmi 44 gün ərzində Ermənistan diz çökdürüldü. Bütün bunlar Azərbaycanın böyük nailiyyətləri və uğurlarıdır".
O bildirib ki, Ermənistanda siyasi proseslər yol ayrıcındadır: "Onlar bundan sonra hansı istiqamətdə hərəkət etməli olduqlarını və siyasətlərini necə quracaqlarını düşünürlər. Bu baxımdan Azərbaycanı nümunə kimi götürürlər. Azərbaycanın regionda tutduğu mövqe, müxtəlif ölkələr və güc mərkəzləri ilə münasibətləri necə qurması, müstəqil xarici siyasət yürütməsi onların diqqət mərkəzindədir. Azərbaycanın təcrübəsini öyrənir və onu tətbiq etməyə çalışırlar. Etiraf etsələr də, etməsələr də, bu, belədir. Əgər seçkiqabağı təşviqat kampaniyasında Azərbaycan amili və Azərbaycan rəhbərinin adı bu qədər səslənirsə, deməli, bu artıq reallıqdır.
Məsələnin digər tərəfi isə ondan ibarətdir ki, Ermənistan daxilində Rusiyaya, yoxsa Qərbə yönəlmək məsələsi ətrafında müzakirələr aparılır. Ancaq onlar yaxşı başa düşürlər ki, Ermənistanın gələcəyi Azərbaycan və Türkiyə ilə münasibətlərdən ciddi şəkildə asılıdır. Bu səbəbdən də Azərbaycan və Türkiyə ilə münasibətləri normallaşdırmağa çalışırlar ki, dövlətlərini qoruyub saxlaya bilsinlər. Bu, Ermənistan baş naziri Nikol Paşinyanın siyasətidir. Ona qarşı çıxanlar belə, istər-istəməz eyni mövqedən çıxış edirlər. Paşinyan da siyasətini kifayət qədər ustalıqla həyata keçirir. Gördüyümüz kimi, o, seçki kampaniyasını fərqli formada aparırdı. İlk baxışdan belə görünürdü ki, mitinqlərinə az adam gəlir və revanşist qüvvələr də bunu onun əleyhinə arqument kimi istifadə edirdilər. Lakin Paşinyan öz üslubuna üstünlük verirdi. O, küçədə, avtobusda, metroda, kafelərdə sadə insanlarla görüşür, onlarla müzakirələr aparırdı. Bu görüşlər çəkilərək sosial şəbəkələrdə paylaşılırdı. Müxtəlif televiziya kanalları da bunları müəyyən formada işıqlandırırdı. Sosial şəbəkələrdə yayılan görüntülər isə kifayət qədər geniş auditoriyaya çatırdı. Yüz minlərlə insan ona baxırdı. Nəticədə isə heç kimin gözləmədiyi şəkildə kampaniyanı yekunlaşdırdı. On minlərlə, bəlkə də yüz minlərlə insanın iştirak etdiyi mitinq keçirdi və bununla da müxalifətin şanslarını demək olar ki, sıfıra endirdi".
A.Nağı Paşinyanın seçkilərdə qalib gələcəyini düşündüyünü də qeyd edib:
"Bütün əlamətlər bunu göstərir. Amma hər halda seçkidir. Seçki bir tapmacadır, açılmamış qutudur. Qutu açılmadan nəticəni heç kim dəqiq proqnozlaşdıra bilməz.
Bununla belə, ümumi mənzərə və müşahidə olunan əlamətlər Paşinyanın qələbəsinin real olduğunu göstərir. Hakimiyyətdə olanlar da Azərbaycan və Türkiyə ilə münasibətləri inkişaf etdirməyə çalışırlar. Onların Azərbaycan və Türkiyənin dəstəyinə ehtiyacı var.
Artıq anlayırlar ki, yalnız Rusiya və ya Qərbə söykənmək kifayət deyil. Azərbaycan və Türkiyə ilə əməkdaşlıq etmək, onlara arxalanmaq lazımdır. Hakimiyyətə gəlmək istəyən qüvvələr anti-Azərbaycan ritorikasından istifadə etsələr də, reallığı anlayırlar. Bu, Azərbaycanın regionda formalaşdırdığı lider mövqeyindən irəli gəlir. Onlar da bu reallıqla hesablaşırlar. Buna görə də hesab edirəm ki, baş verənlər tam qanunauyğundur və təsadüfi xarakter daşımır".
Fatimə Məmmədova
18:25 06.06.2026
Oxunuş sayı: 163
