“Səhiyyə İdarəçiləri Zirvəsi 2024”də dayanıqlı səhiyyə idarəetməsi mövzusu müzakirə edilib

Zirvənin tədbirlər proqramı çərçivəsində açılış nitqi ilə çıxış edən TƏBİB-in Strateji inkişaf departamentinin rəhbəri Murad Mirzəyev bildirib ki, səhiyyə idarəçilərinin rolu və öhdəliklərini müzakirə etmək üçün tədbir əhəmiyyətli platformalardan biridir. M.Mirzəyev panel müzakirələri barədə məlumat verib və tədbirin işinə uğurlar arzulayıb.

Daha sonra panel müzakirələrinə start verilib.

Panel müzakirəsinin I sessiyası Yeni Klinikanın iqtisadi işlər üzrə direktor müavini Ravil Tağıyevin moderatorluğu ilə baş tutub.

Sessiyada TƏBİB-in İcraçı direktorunun müavini Araz Nəsirov bildirib ki, TƏBİB qurularkən tabeli tibb müəssisələrinin büdcəsi 800 milyon manat civarında olub, amma bu gün həmin müəssisələrin büdcəsi 1.8 milyard manata yaxınlaşır:

"Bunun da ilkin səhiyyə büdcəsini nəzərə almasaq, 1.3 milyard civarında büdcəmiz var. Hazırda TƏBİB tabeli 90 tibb müəssisəsi var ki, 20-ə yaxını özünü maliyyələşdirə bilir. Hədəfimiz növbəti illərdə daha çox tibb müəssisəsinin özünü maliyyələşdirə bilməsini təmin etməkdir".

İcraçı direktorun müavini əlavə edib ki, rəqəmsallaşma tətbiq etmək hələ rəqəmsal olmaq demək deyil, bu istiqamətdə qurumlar arasında məlumat inteqrasiyasının mövcudluğu vacibdir və rəqəmsallaşmanın genişləndirilməsi ilə kağızdan tam imtina etmək mümkündür.

Qarabağ Universitetinin Tibb proqramlarının direktoru Samir Babayev çıxışı zamanı eyni vəzifədə çalışan işçilərin bərabər maaş almasının komandadaxili iş birliyini gücləndirməsindən və pasiyentlərin konkret həkimi seçməyə ehtiyac duymadan tibbi xidmət alacaqlarının üstünlüklərindən bəhs edib. O bildirib ki, sözügedən prinsiplərin Qarabağ Universitetində tətbiqi yerli təhsil və səhiyyə sektorunda ciddi yeniliklərə, rəqabət qabiliyyətinin artmasına səbəb ola bilər.

İcbari Tibbi Sığorta üzrə Dövlət Agentliyinin Strateji inkişaf və iqtisadi təhlil departamentinin rəhbəri Ramil Muxtarzadə icbari tibbi sığortanın tətbiqindən sonra ölkədə cibdən ödənişlərdə azalmanın müşahidə olunduğunu deyib. O bildirib ki, cibdən ödənişlərin böyük hissəsini dərman vasitələrinə sərf olunan pullar təşkil edir və artıq gələn ildən etibarən ambulator dərman vasitələrinin icbari tibbi sığorta çərçivəsində təmin edilməsi nəzərdə tutulub.

“Rəqəmsal Tibbi Həllər” MMC-nin direktoru Ramil Mehdiyev səhiyyə sistemində süni intellektin tətbiqi ilə bağlı fikirlərini bildirib. O qeyd edib ki, süni intellekt xəstəliklərin erkən diaqnozunda, radioloji nəticələrin analizi ilə insanlarda hansı xəstəliklərin ola biləcəyini öncədən aşkar etməkdə rol oynayacaq və nəticədə, xəstəliyin müalicəsinə əvvəlcədən başlamaq mümkün olacaq.

Mərkəzi Neftçilər Xəstəxanasının direktoru Musa Abbasov çıxışı zamanı qeyd edib ki, bu gün səhiyyə sisteminin inkişafında rəqəmsallaşma və innovasiya ən mühüm amillərdən biridir və elektron səhiyyə sistemlərinin tətbiqi, rəqəmsal tibbi məlumat bazalarının yaradılması və təkmilləşdirilməsi səhiyyə xidmətlərinin daha şəffaf və effektiv olmasına şərait yaradır. Bu texnologiyalar isə təkcə idarəetmə proseslərini asanlaşdırmır, eyni zamanda vətəndaşların tibbi xidmətlərdən istifadəsini sürətləndirir və keyfiyyətini artırır.

Panel müzakirəsinin II sessiyası TƏBİB-in Strateji inkişaf departamentinin Korporativ əməkdaşlıq şöbəsinin müdiri Nigar Rüstəmlinin moderatorluğu ilə baş tutub.

TƏBİB-in İcraçı direktorunun müavini Anar İsrafilov çıxışı zamanı bildirib ki, tibdə keyfiyyət və onun idarəolunması yeni anlayışdır:

“Xarici ölkələrdə keyfiyyət standartları çoxdan tətbiq olunur. Ən məşhur standartlardan biri ISO standartıdır. Azərbaycan artıq bu sahədə bütün ölkələrin getdiyi yolu tətbiq etməyə başlayıb. Həmin standartlar üzərindən milli standartlarımızı hazırlamağa başladıq. İcbari tibbi sığorta işə başlamamışdan öncə xəstəxanalarımızda bu anlayış yox idi. Artıq 20 standartımız təsdiqlənib və xəstəxanalarda tətbiq olunur”.

Dövlət Tibbi-Sosial Ekspertiza və Reabilitasiya Agentliyinin İdarə Heyəti sədrinin müavini Vüqar Məmmədov qeyd edib ki, bəzi hallarda həkimlər təzyiq və təhdidlə qarşılaşır, özünü qoruya bilmir, çünki hər iki tərəf konfliktdə özünü haqlı sayır. Bunun üçün etibarlı orqan olmalıdır və heç bir tərəf üçün şübhəli məqam qalmamalıdır. Belə olan halda hüquqi sistemdə məhkəmə tibbi ekspertizası önəmli rol oynamalıdır.

Azərbaycan Respublikası Səhiyyə Nazirliyinin Səhiyyə siyasəti şöbəsinin müdiri Ramik Quliyev qeyd edib ki, 2025-ci ildə bütün tibbi qeydiyyat sənədləşməsi elektron varianta keçəcək və hazırda rəqəmsallaşma, müasir dünya ilə ayaqlaşmaq, sürətli və operativ tibbi xidməti təmin etmək üçün Səhiyyə Nazirliyində ciddi Tədbirlər Planı hazırlanır və tezliklə müvafiq addımlar atılacaq.

Bakı Sağlamlıq Mərkəzinin İcraçı direktoru Asiman Həsənov tibb müəssisələrində göstərilən tibbi xidmətlərin keyfiyyətindən bəhs edib, pasiyentin məmnunluğunun önəmli olmasını, eləcə də məmnunluğun keyfiyyətin göstəricisi olduğunu qeyd edib.

Yeni Klinikanın direktoru Barat Yusubov tibb müəssisəsi ilə “Sana Hospital Group” arasında bağlanan əməkdaşlıq müqaviləsindən danışıb. O bildirib ki, müqavilədə xəstəxana idarəetməsi üzrə təcrübə mübadiləsi, xarici pasiyentlərin cəlb edilməsi, həkimlər, tibb bacıları və administrativ işçilər üçün qarşılıqlı peşəkar təkmilləşmə proqramlarının təşkil edilməsi, eləcə də tibb bacılığı üzrə peşəkar kadrların yetişdirilməsi üçün standartların işlənib hazırlanması, təkmilləşdirilməsi yer alıb.