Dabaq xəstəliyi ilə bağlı gözlənilən açıqlama: Xəstəliyin yayılmaması üçün...
Son günlərdə gündəmin əsas mövzularından biri cütdırnaqlı heyvanlar arasında geniş yayılan dabaq xəstəliyidir. Az qala, hər gün hər birimiz bu xəstəlik barədə nə düşünürük. Çünki istifadə etdiyimiz qidalarda, o cümlədən ətdə bu xəstəliyin olması ehtimalı var. Ən dəhşətlisi isə xəstəliyin insana keçdiyini iddia edənlər də az deyil.
İş Adamları Cəmiyyətinin Milli Assosiasiyasının üzvü, qida təhlükəsizliyi üzrə ekspert Tural Həsənov sözügedən xəstəliklə bağlı Crossmedia.az-a açıqlamasında deyib ki, bu, əsasən inəklərdə rast gəlinir və tarix boyu olub: “Bu il xəstəlik bir az daha qabarıq müşahidə olunub. Dabaq insanlarda qrip kimidir və heyvanlar arasında yayılan virusdur. Xəstəliyin qarşısını almaq üçün vaxtında peyvənd olunmalı və müvafiq iynə-dərman tətbiq edilməlidir”.
O bildirib ki, dabaq virusu həmçinin hava yolu ilə yayıla bilər: “Məsələn, ölkəyə idxal olunan heyvanlar vasitəsilə və ya başqa yollarla keçə bilər. Xəstə heyvanın ətini yeməmək tövsiyə olunur, amma düzgün bişirilmiş halda insan üçün ciddi təhlükə yaratmır. Yəni xəstə heyvanın ətini yemək təhlükəli olmasa da, xəstəliyin yayılmaması üçün istifadə edilməməlidir”.
Lalə Rəvəndi
21:02 04.11.2025
Oxunuş sayı: 4203
