Ukrayna və Azərbaycan səhiyyə sahəsində "Yol Xəritəsi" hazırlayır - Deputat
Ukrayna və Azərbaycan yaxın aylarda səhiyyə sahəsində əməkdaşlıq üzrə “Yol Xəritəsi”ni imzalamağı planlaşdırır. Bu sənəd tibbi mütəxəssis mübadiləsi, ortaq təlim və elmi-tədqiqat layihələrini əhatə edəcək, səhiyyə xidmətlərinin keyfiyyətinin artırılmasına və resursların səmərəli paylaşılmasına şərait yaradacaq. Yol Xəritəsi həm də hər iki ölkənin strateji səhiyyə diplomatiyasını gücləndirəcək və regionda sağlamlıq sahəsində lider mövqeyini möhkəmləndirəcək.
Bu barədə deputat Rəşad Mahmudov Crossmedia.az-a açıqlama verərək bildirib ki, Ukrayna və Azərbaycan arasında səhiyyə sahəsində əməkdaşlıq üzrə “Yol Xəritəsi”nin hazırlanması və yaxın aylarda imzalanması planlaşdırılır: "Əgər bu sənəd imzalansa, iki ölkə arasında tibb, elm, texnologiya və humanitar sahələrdə əlaqələr sistemli şəkildə yeni mərhələyə keçə bilər.
İlk növbədə, Yol Xəritəsi mütəxəssis mübadiləsi, ortaq təlim proqramları və birgə elmi-tədqiqat layihələrinin həyata keçirilməsini stimullaşdıra bilər. Ukraynanın son illərdə travma, hərbi tibb, reabilitasiya və fövqəladə vəziyyətlərdə tibbi yardım sahəsində topladığı təcrübə, Azərbaycanın isə kardiocərrahiyyə, transplantasiya, klinik protokollar və elektron səhiyyə istiqamətindəki nailiyyətləri bir-birini tamamlayan sinerji yarada bilər.
Sənədin imzalanması həmçinin səhiyyə sistemlərinin idarəetmə modellərinin, keyfiyyət standartlarının və kliniki təlimatların uyğunlaşdırılmasına şərait yaradacaq. Bu, xidmətlərin keyfiyyətinin artırılması, səhv risklərinin azaldılması və pasiyent təhlükəsizliyinin gücləndirilməsi baxımından ciddi addım ola bilər".
Əməkdaşlığın bir başqa praktik tərəfi resursların səmərəli paylaşılması və səhiyyə infrastrukturunun modernləşdirilməsidir:
"Yol Xəritəsi çərçivəsində iki ölkə arasında tibbi avadanlıqların, texnologiyaların, dərman təminatının və tədris resurslarının birgə istifadəsi mümkün ola bilər. Belə platforma həm xərclərin optimallaşdırılmasına, həm də yeni nəsil səhiyyə texnologiyalarının tətbiqinə zəmin yaradacaq".
Rəşad Mamhmudov qeyd edib ki, əgər sənəd imzalansa, bu, həm də hər iki ölkənin “səhiyyə diplomatiyası” istiqamətində strateji əməkdaşlığını gücləndirəcək: "Ukrayna üçün bu əməkdaşlıq müharibə və böhran şəraitində səhiyyə sisteminin bərpasına, reabilitasiya potensialının artırılmasına real dəstək demək olacaq. Azərbaycan üçün isə beynəlxalq səhiyyə əlaqələrində rolunun və nüfuzunun artması, regionda sağlamlıq sahəsində lider mövqeyinin möhkəmlənməsi anlamına gələcək.
Yol Xəritəsində kardiologiya, onkologiya, neyrocərrahiyyə, reabilitasiya və ictimai sağlamlıq kimi sahələr üzrə xüsusi proqramlar da nəzərdə tutula bilər. Bu proqramlar vasitəsilə həkimlər və elmi mütəxəssislər arasında bilik mübadiləsi güclənər, ortaq elmi tədqiqatlar və təcrübə proqramları formalaşdırıla bilər.
Nəticə etibarilə, Yol Xəritəsi yalnız diplomatik sənəd deyil, həm də hər iki ölkənin səhiyyə sisteminin gələcəyini birləşdirən strateji yol xəritəsi ola bilər. Əgər bu təşəbbüs reallaşarsa, Azərbaycan və Ukrayna arasında daha sağlam cəmiyyətlər, dayanıqlı səhiyyə sistemləri və humanist əməkdaşlığa əsaslanan yeni bir səhiyyə modeli formalaşa bilər".
Türkan Kərimli
15:05 31.10.2025
Oxunuş sayı: 1262
