Ukrayna və Rusiya savaşının gələcəyi - Politoloqdan şərh
Rusiya-Ukrayna münaqişəsi 2022-ci ilin fevralında başlayan genişmiqyaslı müharibə ilə yeni bir mərhələyə daxil oldu və bu müharibə beynəlxalq miqyasda ciddi geopolitik və humanitar təsirlər yaratdı. 2025-ci ildə münaqişənin həlli ilə bağlı gözləntilər artır.
Mövzu ilə bağlı politoloq Elçin Xalidbəyli Crossmedia.az-a açıqlama verib.
“Ukrayna savaşı artıq həll edici mərhələyə çatıb. Yaxın həftələrdə Ukrayna savaşının gələcək taleyi aydınlaşma mərhələsinə keçid edəcək. Donald Tramp administrasiyasının öz səlahiyyətlərinin icrasına başlamasından sonra Ukrayna savaşının dayandırılmasında konkret addımların atılması gözlənilir. Donald Trampın əsas hədəfi Ukrayna savaşının dayandırılmasıdır və eyni zamanda plana görə Ukraynanın ərazi bütövlüyü təhlükə altındadır”.
Politoloqun fikrincə, “Trampın strategiyasına görə, Ukrayna Rusiya tərəfindən işğal olunmuş ərazilərinin müəyyən bir hissəsini Kremlə güzəştə getməli ola bilər. Rəsmi Kiyev hələ buna etiraz edir və müqavimət göstərməyə çalışır. Lakin bu qarşıdurmanın nəticə verəcəyi inandırıcı deyil. Çünki Donald Tramp öz layihəsini reallaşdırmaqda israrlı mövqe tutarsa, bu halda ABŞ Ukraynaya təzyiq göstərməyə başlayacaq. İstismardan sonra isə Ukrayna ərazilərinin bir hissəsini Rusiyaya güzəştdə getmək məcburiyyətində qala bilər. Lakin bu da qeyri-rəsmi xarakter daşıyacaq. Yəni, Rusiyanın hazırda işğal etdiyi ərazilər mövcud cəbhə xətti üzərindən rəsmi olmayan şəkildə yeni sərhəd kimi Kremlin nəzarətində qala bilər. Bütün bunlar onu göstərir ki, Ukrayna savaşının gələcək taleyi ilə bağlı qəliz bir mərhələ başlamaq üzrədir və bu çətin dövr Ukraynanın mövcudluğu üçün olduqca təhlükəlidir”.
Fidan Hacızadə
11:36 17.12.2024
Oxunuş sayı: 25216
