Azərbaycan-Litva hərbi polis əməkdaşlığı: NATO təcrübəsi və yeni imkanlar
Azərbaycan son illərdə müxtəlif dövlətlərlə təhlükəsizlik və müdafiə sahəsində əməkdaşlığını genişləndirməkdə davam edir. Bu istiqamətdə Litva ilə hərbi polis sahəsində əlaqələrin inkişaf etdirilməsi də diqqət çəkən məqamlardan biridir. NATO üzvü olan Litvanın təhlükəsizlik və hərbi idarəetmə sahəsində formalaşmış təcrübəsi, eləcə də Azərbaycanın müharibədən sonra əldə etdiyi praktiki təcrübə tərəflər arasında qarşılıqlı əməkdaşlıq üçün yeni imkanlar yaradır. Mütəxəssislərin fikrincə, bu əməkdaşlıq həm təcrübə mübadiləsinə, həm də hərbi sahədə nizam-intizam və idarəetmənin daha da təkmilləşdirilməsinə xidmət edə bilər.
Mövzu ilə bağlı hərbi ekspert Üzeyir Cəfərov Crossmedia.az-a açıqlama verib:
“Azərbaycanla Litva arasında hərbi polis sahəsində əməkdaşlığın genişləndirilməsi müzakirə olunur. Ümumiyyətlə, Azərbaycan son illərdə müxtəlif ölkələrlə bir çox istiqamətlər üzrə əməkdaşlıq edir və qarşılıqlı maraq doğuran məsələlər daim müzakirə olunur. Məlumdur ki, Litva NATO üzvü olan ölkələrdən biridir. Baltik respublikaları SSRİ dağıldıqdan sonra NATO-ya üzv olublar və bu müddət ərzində müəyyən hərbi təcrübə, idarəetmə sistemi və təhlükəsizlik sahəsində ciddi praktika formalaşdırıblar. Azərbaycan isə müharibə aparmış və qalib çıxmış dövlətdir. Bu baxımdan Litvanın hərbi polisi ilə Azərbaycanın hərbi polisi arasında müzakirə ediləcək və qarşılıqlı maraq doğuracaq kifayət qədər məsələlər mövcuddur. Bir NATO ölkəsinin hərbi polis sisteminin fəaliyyəti ilə müharibədən çıxmış bir ölkənin hərbi polisinin gündəlik fəaliyyəti, nizam-intizamın qorunması və döyüş qabiliyyətinin artırılmasındakı rolu arasında ortaq məqamlar var. Məhz bu səbəbdən tərəflər arasında qarşılıqlı təcrübə mübadiləsi aparılır, səfərlər təşkil olunur və müəyyən proqramlar həyata keçirilir”.
Ekspert əlavə edib ki, Azərbaycan hərbi polisinin nümayəndələri bundan sonra da Litvaya səfərlər edəcəklər, eyni zamanda Litvalı həmkarların Azərbaycana səfərləri təşkil olunacaq: “Son illər hərbi polisin fəaliyyəti daha da genişlənib. Nəzərə almaq lazımdır ki, Azərbaycanda ilk dəfə olaraq hərbi polisə general rütbəli şəxs — general-mayor Ergün Əliyev rəhbərlik edir. Bu da hərbi polisin Azərbaycan Ordusundakı rolunun və əhəmiyyətinin artdığını göstərir. Hazırda hərbi polis həm qarnizonlarda, həm də işğaldan azad edilmiş ərazilərdə fəaliyyət göstərir. Bu fəaliyyət çərçivəsində müxtəlif proqramlar, təlimlər və treninqlər təşkil olunur. Hərbi polis çox məsuliyyətli və ağır vəzifələri yerinə yetirir. Buraya ölkəyə gələn xarici qonaqların təhlükəsizliyinin təmin olunması, hərbi təlimlərin müşayiəti, hərbi təhsil sahəsində görülən işlərin həyata keçirilməsi, təlim-tərbiyə prosesinə nəzarət və ümumilikdə silahlı qüvvələrdə nizam-intizam məsələlərinin təmin edilməsi daxildir. Bu sahələrin hər biri xüsusi peşəkarlıq tələb edir. Ona görə də hərbi polis artıq önəmli strukturlardan biri kimi NATO ölkələri ilə də əməkdaşlıq və müzakirələr aparır. Hesab edirəm ki, bu əməkdaşlıq hər iki ölkə üçün faydalı olacaq və qarşılıqlı təcrübə mübadiləsi həm təhlükəsizlik, həm də nizam-intizam sahəsində mühüm töhfələr verəcək”.
Ayhan
13:00 29.05.2026
Oxunuş sayı: 91
