Xarici xəbərlər

Qarri Kasparov beynəlxalq axtarışa verilib

Rusiya istintaq orqanları şahmat üzrə keçmiş dünya çempionu Qarri Kasparov barəsində beynəlxalq axtarış elan edib. O, qiyabi olaraq terrorçuluğa haqq qazandırma və “xarici agent” fəaliyyəti ittihamları ilə təqsirləndirilir.

Crossmedia.az bu barədə TASS-a istinadən xəbər verir.

Məlumatda qeyd olunur ki, Kasparov barəsində həm federal, həm də beynəlxalq axtarış elan edilib və iş materialları hazırda istintaq orqanlarının sərəncamındadır.

Moskva məhkəməsi 2025-ci il 22 dekabr tarixində onun barəsində həbs qətimkan tədbiri seçib. Qərara əsasən, o, Rusiyaya ekstradisiya və ya deportasiya ediləcəyi halda, yaxud Rusiya ərazisində saxlanılacağı təqdirdə iki ay müddətinə həbs edilə bilər.

Qərar daha sonra Moskva Şəhər Məhkəməsi tərəfindən qanuni hesab edilərək qüvvədə saxlanılıb.

Rusiya tərəfi bildirir ki, Kasparov əvvəlcə terrorçuluğa haqq qazandırma maddəsi ilə ittiham olunub, daha sonra isə “xarici agent” qaydalarının pozulması ilə bağlı iki əlavə epizod üzrə də təqsirləndirilib.

Qeyd edək ki, Qarri Kasparov 2022-ci ildə Rusiya Ədliyyə Nazirliyi tərəfindən “xarici agent” siyahısına daxil edilib və hazırda ölkə xaricində yaşayır.

🖨 Çap et

10:42 23.05.2026

Oxunuş sayı: 394