Robot buddist rahib rolunda çıxış edəcək: Məbədlərdə dəyişiklik baş verir
Seul şəhərində yerləşən Jogyesa Temple məbədində “Gabi” adlı humanoid robot rəsmi mərasimlə Buddist rahib kimi təqdim olunub. Robot ənənəvi rahib geyimində göstərilib, boynuna 108 muncuqdan ibarət dua boyunbağı taxılıb və bəzi ritual elementlər simvolik şəkildə ona uyğunlaşdırılıb.
Crossmedia.az "The New York Times"a istinadən bildirir ki, Buddist icmalar bu addımı təkcə nümayiş deyil, dinin gələcəyi üçün sınaq və adaptasiya cəhdi kimi qiymətləndirir.
Ölkədə Buddistlərin sayının azalması və gənclərin məbədlərdən uzaqlaşması fonunda icmalar meditasiya tətbiqləri, sosial media layihələri və texnoloji həllərlə yeni auditoriyaya çıxmağa çalışır.
“Gabi” üçün xüsusi qaydalar müəyyən edilib. Robot insanlara zərər verməməli, etik davranmalı və “özünü həddən artıq yükləməməlidir” kimi simvolik prinsipə əməl etməlidir.
Robotun ən çətin öyrəndiyi proseslərdən biri dua hərəkətlərinin təqlididir. Texniki olaraq mümkün olsa da, insan hərəkətlərinin təbii axıcılığını təkrarlamaq çətinlik yaradıb.
“Gabi”nin yaxın günlərdə Seulda keçiriləcək Lotus Lantern paradında iştirak edəcəyi bildirilir. Bu tədbir Buddanın doğum günü münasibətilə təşkil olunur və minlərlə insanı bir araya gətirir.
Hadisə dini ənənələrlə texnologiyanın kəsişdiyi yeni mərhələ kimi qiymətləndirilir.
Nigar Xəlilli
00:35 13.05.2026
Oxunuş sayı: 58
