Qışa hazırlıq: Su təchizatı ilə bağlı vətəndaşlara xəbərdarlıq edildi
Azərbaycan Dövlət Su Ehtiyatları Agentliyinin İri Şəhərlərin Birləşmiş Su Təchizatı Xidməti hazırda qış aylarında su təchizatı sistemində yarana biləcək problemlərin aradan qaldırılması istiqamətində işlərini davam etdirir.
Crossmedia.az xəbər verir ki, kanalizasiya kollektorlarının yuyulması, baxış quyularının və yağış barmaqlıqlarının təmizlənməsi işləri aparılır ki, xətlər intensiv yağışlar zamanı həm yağış sularını, həm də tullantı sularını maneəsiz şəkildə daşıya bilsin. Eyni zamanda, kanalizasiya nasos stansiyaları təftiş olunur, mövcud mexaniki avadanlıqlar saz vəziyyətə gətirilir.
Qış aylarında ən çox rast gəlinən problemlər sayğaclar və magistral paylayıcı şəbəkələrdə baş verən donmalardır. Vətəndaşlar tərəfindən primitiv qaydada çəkilmiş su xətlərinin əksəriyyətində izolyasiya məsələləri nəzərə alınmamışdır. Tövsiyə edilir ki, həmin xətlər ya izolyasiya olunsun, ya da torpaq altına keçirilsin.
Fərdi yaşayış evlərində, həyətyanı sahələrdə və kommersiya obyektlərində quraşdırılmış sayğacların şaxtalı günlərdə sıradan çıxmasının qarşısını almaq üçün zəruri tədbirlərin görülməsi vacibdir. Şaxtanın daha çox olduğu gecə saatlarında sayğacın giriş vintili bağlanmalı, çıxış vintili açıq saxlanmalı və sayğac qutusunun qapağı bağlı qalmalıdır.
Bundan əlavə, sayğacların donmadan qorunması üçün onların üzərinə isti material örtülməsi və quru ağac yonqaları ilə əhatə olunması tövsiyə edilir.
Gültac Mehdizadə
09:10 14.12.2024
Oxunuş sayı: 20325
