Biləkdə sinir sıxılması: Sadə prosedur daha uzunmüddətli rahatlıq verə bilər
Alimlər biləkdə sinir sıxılması ilə xarakterizə olunan tunel sindromunun müalicəsində əməliyyata ehtiyacı azalda biləcək yeni üsulun effektivliyini araşdırıblar. Crossmedia.az xəbər verir ki, “Radiology” jurnalında dərc olunan tədqiqatın nəticələrinə görə, ultrasəs nəzarəti altında fizioloji məhlulla aparılan 15 dəqiqəlik prosedur kortikosteroid iynəsi ilə müqayisədə daha davamlı yaxşılaşma ilə əlaqələndirilib.
Karpal tunel sindromu zamanı biləkdə yerləşən orta sinir sıxılır. Bu, ağrıya, keyiməyə və əl əzələlərində zəifliyə səbəb ola bilər. Məlumatlara görə, insanların təxminən 5-10 faizi həyatı boyu bu problemlə üzləşir.
Tədqiqatda davamlı simptomları olan 63 pasiyent iştirak edib. Onlar təsadüfi qaydada üç qrupa bölünüblər. Birinci qrupa ultrasəs nəzarəti altında yalnız fizioloji məhlul tətbiq edilib, ikinci qrupda fizioloji məhlula kortikosteroid əlavə olunub, üçüncü qrupa isə yalnız hormonal preparat inyeksiya edilib.
Hidrodissеksiya adlanan üsulda sıxılmış sinirin ətrafına maye yeridilərək onun ətraf toxumalardan mexaniki şəkildə ayrılması və sərbəstləşdirilməsi hədəflənir.
Altı aylıq müşahidənin nəticələrinə əsasən, fizioloji məhlulla hidrodissеksiya tətbiq olunan qruplarda orta sinirin en kəsiyinin sahəsi təxminən 43-45 faiz azalıb. Yalnız kortikosteroid inyeksiyası alan qrupda isə bu göstərici təxminən 15 faiz təşkil edib. Fizioloji məhlula kortikosteroid əlavə edilməsi nəzərəçarpan əlavə fayda verməyib.
Tədqiqat müəlliflərindən biri bildirib ki, kortikosteroid inyeksiyaları çox vaxt yalnız müvəqqəti rahatlıq yaradır. Yalnız steroid alan pasiyentlərdə ilkin müsbət təsirin sonradan zəiflədiyi müşahidə olunub.
Müəlliflərin məlumatına görə, prosedur orta hesabla 15 dəqiqə davam edir və pasiyent işə təxminən bir saat sonra qayıda bilər. Bununla belə, araşdırmada cəmi 63 nəfərin iştirak etməsi nəticələrin daha geniş tədqiqatlarla təsdiqlənməsinə ehtiyac olduğunu göstərir. Prosedurun hər pasiyent üçün əməliyyatı əvəz edəcəyini söyləmək hələ tezdir.
01:56 23.10.2026
Oxunuş sayı: 58
