Baş verən hadisələr Ukraynadakı müharibəyə də təsirsiz ötüşməyəcək - AÇIQLAMA
Litvanın sabiq xarici işlər naziri Qabrielius Landsbergis bildirib ki, Suriyada baş verənlər Ukraynada Rusiyanı məğlub etmək ehtimalından xəbər verir. Həmçinin o vurğulayıb ki, Suriya nümunəsinə görə, Rusiyanı qovmaq olar və o öz evinə qayıdacaq. Baltikyanlılar haqlı idilər, Qərb qalib gəlmək üçün kifayət qədər güclüdür. Ukraynada və ya başqa yerlərdə fəsad törədən “ayıdan” qorxmaq lazım deyil". Bəs Qabrielius Landsbergisin bu açıqlamaları, Qərbin Rusiya siyasətində hansı dəyişikliklərə səbəb ola bilər? Baltikyanı ölkələrin Rusiya ilə bağlı strategiyası digər ölkələr üçün nümunə ola bilərmi?
Məsələ ilə bağlı politoloq Məhəmməd Əsədullazadə Crossmedia.az-a açıqlamasında bildirib ki, Rusiya on ildən artıq idi ki, Suriyada siyasi və hərbi mövqeyini gücləndirmişdi:
"Demək olar ki, Rusiya Bəşər Əsədi qoruyurdu, amma göründüyü kimi bu proseslərin gedişində ciddi şəkildə geosiyasi mövqeləri zəiflədi və müxaliflər qalib gəldi. Təbii ki, burada Qərb və Türkiyə kordinasiyalı şəkildə fəaliyyət göstərir. Əlli ildən artıqdır ki, Suriyada mövcud olan Rusiya hərbi bazaları da Aralıq dənizi sahilindən çıxarılacaq. Bu, Rusiyanın Yaxın Şərq strategiyasına böyük bir zərbədir. Sözsüz, baş verən hadisələr Ukraynadakı müharibəyə də təsirsiz ötüşməyəcək. Digər tərəfdən Qərb Rusiya üzərində ciddi şəkildə siyasi və hərbi üstünlük əldə etdi və Ukraynada da qalib gələcək.
M. Əsədullazadə qeyd edib ki, müharibənin uzanması Ukrayna resurslarını, hərbi hissədə şəxsi heyətini ciddi şəkildə zəiflədir:
"Amma bu strateji müharibədir, yeni dünya nizamı qurulur və düşünürəm ki, Qərb burada üstün gələcək. Təbii ki, Baltikyanı ölkələrin sərt Rusiya xətti, öz təhlükəsizliyini ciddi şəkildə qoruması digər Avropa ölkələri, eyni zamanda postsovet ölkələri üçün də nümunə olmalıdır. Çünki onlar prinsipial şəkildə öz təhlükəsizliklərini qoruyurlar və Rusiyaya qarşı sərt xətt siyasətini davam etdirirlər".
Gülşad İbrahimova
09:05 11.12.2024
Oxunuş sayı: 15121
